o papasol

Como defenderes os teus dereitos lingüísticos

2012-01-03T14:36:00.002+01:00

Podes atopar o libro Como defenderes os teus dereitos lingüísticos no andel de Novidades da nosa Biblioteca. Ou podes pedírllelo aos Reis...

Tamén podes visitar o blog de Carlos Callón

Nova radio en galego

2011-11-29T19:37:00.000+01:00

Saudamos con alegría a Anfiteatrogzradio, un proxecto de radio online en Galego, que fomenta os grupos musicais galegos, a literatura do noso País, os blogs do blogomillo... e todo canto teña cabida no mundo da cultura.

Anfiteatrogzradio

Podes colaborar enviando temas musicais se tes unha banda, ou enviando os teus propios podcasts, ou simplemente sintonizando esta radio xa que precisan 130 horas de audiencia diaria para manter viva a iniciativa. Nós engadimos o enlace aos nosos favoritos!

Tomiño pronto terá a súa biblioteca

2011-11-07T22:19:00.000+01:00

Tomiño pronto terá a súa biblioteca municipal!

Será nun lugar céntrico e accesíbel para os potenciais usuarios, ao lado do mercado, na antiga casa do médico, que será rehabilitada coa axuda do ministerio de Fomento, grazas a un convenio que a alcaldesa de Tomiño, Sandra González, asinará proximamente.

Celebramos esta noticia, que podes ampliar aquí.

Tomiñés ilustre

2011-10-23T16:15:00.000+02:00

A proposta de todos os grupos e, por unanimidade, a corporación de Tomiño decidiu nomear fillo predilecto do concello a Xosé Luís Franco Grande. Nado na parroquia de Tebra, no concello de Tomiño, no ano 1936, Franco Grande, que estudou Dereito na Universidade de Santiago e exerceu a avogacía como asesor xurídico da Caixa de Aforros Municipal de Vigo, é unha figura destacada do galeguismo, escritor e membro da RAG.

É polas súas importantes achegas á cultura galega e pola súa traxectoria intelectual que se lle nomea fillo predilecto. Foi autor no ano 1968 do Dicionario galego-castelán de Galaxia, libro que serviu de guía ás primeiras xeracións de estudantes de galego. Tamén afondou na poesía, no teatro e no ensaio, chegando a gañar o Premio Eduardo Pondal. A corporación tomiñesa celebrará proximamente un acto para formalizar o nomeamento.

O polémico retorno de Guillermo de Baskerville

2011-09-23T19:49:00.001+02:00

O escritor italiano Umberto Eco volveu a escribir a novela que lle deu fama, El nombre de la rosa, para facela máis accesible ás novas xeracións. O obxectivo é que os que só coñecen a obra por fragmentos lidos en internet poidan lela completa sen dificultade.

A novela publicouse por primeira vez en 1980, é un auténtico éxito de vendas traducido a máis de 47 linguas e moitos a consideran un dos cen títulos fundamentais do século XX.

En El nombre de la rosa dous monxes, o franciscano Guillermo de Baskerville (personaxe baseado no filósofo Guillermo de Occam e no detective literario Sherlock Holmes) e o seu pupilo, Adso de Melk, investigan unha serie de asasinatos nun mosteiro benedictino, todos eles relacionados cun libro prohibido. En 1986, o cineasta francés Jean-Jacques Annaud rodou unha adaptación cinematográfica, con Sean Connery no papel de Baskerville e Christian Slater como Adso de Melk.

O próximo 5 de outubro sae á venda a nova versión, adaptada polo autor, alixeirada das pasaxes máis densas para que os lectores do século XXI, cada vez máis dixitalizados e rápidos, poidan saborear o misterio e o encanto desta famosa novela...

Amplía esta información aquí

Entéirate da polémica que suscita aquí

Contos estraños

2011-09-20T00:21:00.001+02:00

A nosa iniciativa favorita deste mes é a que nos chega da man de Contos Estraños e consiste na procura de novos escritores e ilustradores para comezar con este proxecto editorial. Aceptan toda clase de orixinais relacionados co mundo do estraño, o fantástico e o grotesco. Nos textos, os formatos preferidos son o conto e a novela curta (estas últimas publicaranse por entregas). Os textos deben ir escritos en galego, ou, no caso de estaren escritos noutra lingua e interesen para a súa publicación, a súa tradución correrá por conta do autor. Xunto co orixinal debe entregarse unha breve sinopse e unha pequena reseña biográfica. A recepción de orixinais farase no correo electrónico contosestranhos@gmail.com, pero podes ampliar esta información e seguir a evolución desta iniciativa desde a páxina Contos estraños que queda agregada aos nosos favoritos.

Eu tamén leo... Los hijos de la Tierra

2011-09-07T16:29:00.000+02:00

Agora que regresamos despois dos meses de verán, nos que tivemos tempo de ler á nosa vontade, os profesores e profesoras do centro coméntannos as súas lecturas vacacionais. Hoxe Carlos Villanueva, profesor de Bioloxía, fálanos da serie LOS HIJOS DE LA TIERRA, de JEAN M. AUEL:

Moitos fomos os que sucumbimos nos anos oitenta ao atractivo da historia da nena Cromagnon criada por Neanderthais. Tratábase dunha novela sen gran valor literario, pero moi dinámica, escrita con corrección e, sobre todo, que trataba un tema de gran atractivo para calquera estudante de Bioloxía, a saber, a posible convivencia entre as dúas variedades de homes que ocuparon Europa e Asia Menor durante os últimos períodos glaciais. A autora facía gala dun exhaustivo labor de documentación, e na obra non faltaban referencias aos achádegos arqueolóxicos e estudos sobre a industria lítica máis importantes e avanzados do momento.

Trinta anos despois, J. M. AUEL dá por rematada a saga, que queda composta definitivamente por seis libros, o último deles publicado hai poucos meses.

No seu momento eu lera os dous primeiros tomos, para despois perderlle a pista aos que pouco a pouco foron sendo publicados. A aparcición na nosa biblioteca de toda a saga animoume a retomar a súa lectura con ansia de saber do devenir das personaxes e por atopar referencias aos coñecementos que a autora puidese ter vertido nos seus libros.

O resultado, porén, resultou algo decepcionante. A partir da terceira entrega, os tomos gañan en volume, pero non en interese. As descricións do medio natural fanse tediosas e repetitivas, e as continuas referencias aos títulos anteriores ralentizan innecesariamente a lectura. Ademais, o tratamento que autora da á protagonista acada uns límites de inverosimilitude que case converten á personaxe nunha heroína con superpoderes.
As narracións seguen a rebosar datos arqueolóxicos pero, na miña opinión, a autora xa non consegue introducilos con acerto na trama. As elucubracións sobre estrutura social e relacións entre grupos parecen máis baseados na fantasía que en datos e, para rematar, o relato dos encontros sexuais dos protagonistas, distribuidos regularmente cada 100 páxinas, son máis propios dunha noveliña rosa para adolescentes que dunha obra que pretende ser lembrada pola sobriedade dos datos que ofrece.

A literatura sen libros

2011-08-25T14:03:00.000+02:00

Dúas perspectivas conviven hoxe no universo literario: a tradicional e a dixital. Vivimos un periodo de transición cara a un mundo onde o importante non é coñecer un dato senón saber onde facer click para atopalo.

Soportes electrónicos de lectura, librarías e bibliotecas virtuais, autores cos que debater online, narrativa hipertextual, comunidades culturais en internet, acceso ilimitado a case todo tipo de obras, posibilidade de converterte en creador, en instrumento do saber, da arte ou do entretemento... Todos estes avances non ameazan á literatura, nin sequera ao libro, como tampouco no seu momento a chegada do cine, a TV e a internet significaron, como algúns profetizaban, o final da ficción literaria; pola contra, os autores aprenderon a convivir con estes medios, mesmo adoptaron nas súas obras procedementos do cine, e a relación entre cine e literatura foi e segue a ser fructífera.

Internet propicia un contacto dos autores co seu público cheo de vantaxes para ambas partes. Un escritor pode recibir novas ideas, corrección de inexactitudes ou erratas nos seus libros, bibliografía... mentres o lector recibe adiantos dunha obra, materiais complementarios e confidencias do autor. Interactuar é a clave en Internet, non só se trata de dar información aos lectores senón tamén de recibila, ou tamén, por que non, autor e lector poden crear xuntos. Case todos os autores de éxito teñen webs modélicos, especialmente cando se centran no público xuvenil (JK Rowling, Laura Gallego). Case todas as editoriais teñen minisites específicos para determinados libros ou autores, ademais de que xa se habituaron a ofrecer online o primeiro capítulo de calquera lanzamento medianamente relevante.

Tamén as comunidades de lectores son fundamentais: nelas os lectores comparten, intercambian, crean, opinan, debaten, propoñen títulos e autores, organizan actividades de todo tipo...

O 80% dos lectores españois ten computadora na casa e o 65% usa internet; deles, o 19% descarga literatura, especialmente os menores de 24 anos e os maiores de 65 (informe da Federación de Gremios de Editores de España).

Desde este blog queremos fomentar a lectura en todas as súas formas e por iso, co comezo do curso, engadiremos unha nova páxina onde se ofrezan enlaces a todos os recursos que os afeccionados á lectura e á escritura podemos utilizar na Rede.

A Biblioteca Dixital Mundial da UNESCO

2011-07-22T13:21:00.000+02:00

Ter á man os tesouros das principais bibliotecas nacionais do mundo! Poder acceder gratis e sen límite de tempo a ese exemplar lexendario, único, que cada quen algunha vez soñou con coñecer...
WDL.org é un proxecto creado pola Biblioteca do Congreso de Estados Unidos e a UNESCO que pretende facer realidade este soño.
A información está organizada por Lugares (Asia, América, Africa, Europa, Antártida e Oceanía), Tempo (de 8000 A.C. á actualidade), Temática (Filosofía, Psicoloxía, Relixión, Ciencias Sociais, Linguas, Ciencias Naturais e Matemáticas, Tecnoloxía, Arte, Literatura, Historia e Xeografía), Tipo de artigo (libros, manuscritos, diarios, mapas, películas, gravados, fotografías, gravacións sonoras) ou Institución (de que Biblioteca procede).
A biblioteca comeza cuns 1200 documentos, pero está pensada para recibir un número ilimitado. Non serán documentos correntes, senón con valor de patrimonio, que permitan aprezar e coñecer mellor as culturas do mundo en idiomas diferentes. Neste escaparate inicial expóñense obras procedentes de 32 institucións de todo o mundo que se uniron ao proxecto, que é aberto e seguirá aumentando os seus fondos. Hai mapas, fotografías, vídeos, manuscritos, libros e láminas sobre feitos acaecidos desde o 8000 antes de Cristo ata o presente: códices precolombinos, traballos de científicos árabes desvelando o misterio da álxebra, ósos utilizados como oráculos, estelas chinesas, a Biblia de Gutenberg... Cada xoia da cultura universal aparece acompañada dunha breve explicación do seu contido e o seu significado. Os documentos foron escaneados e incorporados no idioma orixinal, pero as explicacións aparecen en sete idiomas (árabe, chinés, inglés, francés, ruso, español e portugués).

Visita a páxina aquí .

Outros enlaces relacionados

UNESCO

EUROPEANA

Eclipse de Lúa o mércores día 15 de xuño

2011-06-12T10:01:00.000+02:00

O próximo mércores 15 de xuño poderemos observar unha Eclipse Total de Lúa. Comeza cedo, así que cando saia a Lúa xa aparecerá no horizonte parcialmente eclipsada, pero vale a pena estar pendentes dela pola fermosa cor avermellada que ofrecerá. A eclipse continuará aumentando ata o punto máximo que se producirá ás 20:13 U.T (no noso reloxo, GMT+2, ou sexa: ás 22:13) Esperemos que estea despexado!

Celebrouse a Xornada de Portas Abertas

2011-06-05T18:34:00.000+02:00

Celebrouse onte sábado a XPA do IES de Tomiño, e ofrecémosvos algunhas imaxes dela:

Ofrecéronse visitas guiadas polas instalacións do centro para ver aulas temáticas, exposicións de materiais elaborados polo alumnado e profesorado, houbo competicións deportivas, actuacións musicais etc

Este sábado 4 de xuño, Xornada de Portas Abertas

2011-06-01T21:40:00.000+02:00

PROGRAMA DE ACTIVIDADES

- 11:00 h

Semifinais da Liga de Fútbol-Sala Mixto. No Pavillón

- 12:00 h

- APERTURA do Instituto
- EXPOSICIÓNS dos departamentos didácticos
- VISITAS GUIADAS POLO INSTITUTO
- OBRADOIROS
- Exhibición de Bolos Celtas na cancha de Baloncesto
- Partido amistoso de Fútbol-Sala entre os equipos do IES de Coruxo e o IES de Tomiño. No Pavillón.
- Partida de brilé con participación de todos os visitantes que o desexen.
- Finais Ping Pong. No Ximnasio.
- Presentación das empanadas para o concurso. Na cafetería.

- 13:00 h:
- Figuras de ACROSPORT . Alumnado de 1º de Bacharelato. No ximnasio.
- Final da Liga de Fútbol-Sala Mixto. No Pavillón.

-14:00 h
- COMIDA. Haberá postos de venta de churrasco e empanada a cargo do alumnado de 4º de ESO.

-16:30 h
REINICIO DAS ACTIVIDADES
- EXPOSICIÓNS dos departamentos didácticos
- VISITAS GUIADAS POLO INSTITUTO
- OBRADOIROS
- Campionato de Badminton. No Pavillón

- Actuación do Grupo de Baile Tradicional Virxe do Alivio. Na entrada do Instituto

- 18:30 h

COMEZO DAS ACTUACIÓNS MUSICAIS NO ESCENARIO EXTERIOR

- Banda de Música da Agrupación Musical do Rosal.

- Actuación de baile a cargo de alumnas de 1º e 2º de ESO.

- Actuación de break dance co grupo “Fusion Flow”.

- 20:30 h

- Acto de clausura da Xornada de Portas Abertas

- Entrega de orlas ao alumnado que remata etapa educativa: 4º de ESO, 2º de Bacharelato, 2º de Ciclos Formativos e PCPI.

- Entrega de premios.

Haberá servicio de cafetería durante toda a xornada a cargo do alumnado de 4º de ESO, coa fin de recadar fondos para a súa viaxe de fin de estudos.

Radio Mocidade, a emisora de radio “on line” do Concello de Tomiño, realizará un programa de radio en directo durante a Xornada de Portas Abertas.

Maio de 2011

2011-05-31T22:44:00.000+02:00

No andel de Novidades da nosa Biblioteca este mes non poden faltar dous textos dos que todo o mundo fala.

Indignaos!

Reacciona. 10 razones por las que debes actuar frente a la crisis económica, política y social

Gústache escribir?

2011-05-19T20:10:00.000+02:00

Algunha vez pensaches en dedicarte en serio á literatura? Tes obra escrita que che gustaría publicar? Desde o noso portal favorito, Redelibros, xorde unha iniciativa para dar a coñecer novos autores que che pode interesar. Infórmate aquí

Internet e solidariedade

2011-05-17T00:10:00.000+02:00

Nace a primeira rede social solidaria: facecoop.org é unha nova rede social, especializada en solidariedade, cooperación e participación para o cambio social. O seu obxectivo é pór en contacto persoas, institucións, organizacións, empresas, etc, interesadas ou que traballan en temas como a igualdade de xénero ou a loita contra a pobreza. Sobre a base dese interese compartido, facecoop.org facilita compartir inquedanzas, experiencias, coñecementos e traballo. Igual que noutras redes, pódense subir documentos, imaxes, audios, vídeos, noticias ou crear eventos.

No día de Internet cómpre lembrar que é esta unha ferramenta para o cambio social ao alcance de todos e todas. Desde aquí saudamos con esperanza esta iniciativa e engadimos o enlace á nosa listaxe de favoritos.

Visitar facecoop

Resultados do Concurso LeFoto

2011-05-03T10:36:00.001+02:00

Gañaron o Concurso LeFoto

categoría A: Fabiana Villarroel Rodríguez, 1ºESO-A

categoría B: Fátima Martínez Pereira, 2ºbac-A

categoría C: Carmen Villanueva, profesora de Física (fotografía á esquerda)

A entrega de Premios será o sábado 4 de xuño, durante a Xornada de Portas Abertas. Proximamente concretaremos a que hora exactamente; no caso de non poderen vir recoller o Premio ese día, póñanse en contacto coa coordinadora da Biblioteca, Puri Ameixide.

Maio das Letras

2011-05-01T02:14:00.002+02:00

O vindeiro martes 3 de maio o noso alumnado de 1º ESO participará no Correlingua 2011, que este ano será en Salceda.

páxina do Correlingua

Por outra parte no noso centro celebraremos a Festa das Letras o venres 20 de maio, con actividades de diverso tipo, Milladoiro das Palabras, etc.

Este ano o Día das Letras adícase a Lois Pereiro, que naceu en Monforte de Lemos no ano 1958. Con dezasete anos marchou a Madrid para continuar os seus estudos e alí fundou, xunto con Antón Patiño, Xosé Manuel Pereiro e Manuel Rivas, a revista Loia, que só coñecería catro números (o último de 1978). Nesta publicación apareceron poemas do escritor monfortino que posteriormente serían recollidos en Poemas para unha loia (1996) —libro en que se inclúe o ensaio "Modesta proposición para renunciar a facer xirar a roda hidráulica dunha cíclica historia universal da infamia", que fora dado a coñecer ese mesmo ano nas páxinas da revista Luzes de Galiza. De regreso ao país, Pereiro figurou nas antoloxías colectivas recollidas baixo os títulos De amor e desamor (1984) e De amor e desamor II (1985), compilacións en que figuran nomes como Pilar Pallarés, Miguel Anxo Fernán-Vello, Manuel Rivas, Xavier Seoane, Francisco Salinas, Xulio Valcárcel, Lino Braxe e outros poetas de moi diferentes tendencias mais que partillaban inquedanzas culturais. Entre as iniciativas conxuntas deste grupo heteroxéneo destaca o sostimento da revista Luzes de Galiza, onde viron a luz —para alén do ensaio xa citado— os oito primeiros capítulos da súa novela inconclusa Náufragos do paradiso. En vida Pereiro só publicou dúas obras, Poemas 1981/1991 (1992) e Poesía de amor e enfermidade (1995), poemarios intensos e duros que conteñen pegadas expresionistas e da contracultura. A morte sobreviríalle na cidade Coruña en 1996, afectado pola contaminación do aceite de colza.

Tedes máis información sobre este autor, así como algúns dos seus textos, nunha exposición no vestíbulo do instituto que permanecerá ata o día 20.

A lectura e o goce da pertenza

2011-04-25T21:31:00.001+02:00

Por que a lectura é un antídoto poderoso contra a soedade? Cando lemos, psicoloxicamente pasamos a formar parte da comunidade que se describe no relato. Este mecanismo satisfai unha necesidade profundamente humana e evolutivamente importante: a necesidade de pertenza.

Un estudo realizado na Universidade de Buffalo comprobou como se produce este fenómeno. Os investigadores avaliaron aos participantes, 140 estudantes, en función da súa identificación con determinados grupos e o grao de satisfacción que obtiñan da súa pertenza a estes grupos. Despois, a unha parte destes estudantes fixéronlles ler unha pasaxe da novela "Crepúsculo" na que Edward describe as súas sensacións como vampiro e o seu interese romántico por Bela; outros leron unha pasaxe de "Harry Potter e a pedra filosofal", onde Harry está en clase de "Pocións" co profesor Severus Snape. Os participantes tiveron 30 minutos para ler a pasaxe, e indicóuselles que lesen só por pracer. A continuación mediuse a filiación psicolóxica dos participantes cos vampiros e cos meigos; primeiro, aos estudantes díxoselles que pulsasen, coa maior rapidez e precisión, unha tecla que expresaba "meu/eu" cando aparecían en pantalla palabras como "pau de escoba, feitizo, varita, poción", e debían pulsar outra tecla coas palabras "eles/deles" cando aparecían palabras como "vampiro, sangue, non-morto, mordedura". Despois invertiron os términos. A seguir, os investigadores presentáronlles preguntas que indicasen a identificación cos magos ou os vampiros, por exemplo: "Cres que poderías ser capaz de desaparecer e reaparecer noutro lugar?" ou "Como están de afiados os teus dentes?" Tamén se cubriron uns cuestionarios breves para avaliar o estado de ánimo e a satisfacción de vida dos participantes.

Como era de esperar, os lectores de Harry Potter "convertéronse" en magos e os lectores de Crepúsculo en vampiros. Ademais a "pertenza" a estas comunidades de ficción produciu o mesmo estado de ánimo e satisfacción vital que se acada cando se pertence a algún grupo na vida real.

Ampliar esta información aquí

Día de Rosalía

2011-02-23T10:51:00.002+01:00

O xoves 24 de febreiro, Día de Rosalía, a Asociación de Escritoras e Escritores en Lingua Galega organiza unha lectura simultánea de textos rosalianos en varias cidades e vilas do país. Estes actos están abertos a todo o público que queira asistir, enviando previamente un correo electrónico á oficina at aelg.org para confirmar que poema vai ler cada asistente, e evitar así eventuais repeticións.

- Santiago de Compostela: Panteón de Galegos/as Ilustres, San Domingos de Bonaval, 19:00 horas.
- A Coruña: Kiosko Alfonso, 19:00 horas.
- Vigo: Casa Galega da Cultura, 20:00 horas.
- Lugo: Museo provincial, 19:30 horas.
- Betanzos: Salón azul do Edificio do Liceo, 20:00 horas. Colabora a A. C. Eira Vella.
- Ferrol: Galería Sargadelos, 19:00 horas.
- Ourense. Libraría Torga, 18.00 horas (en colaboración con Gremio LiterAuria).
- Pontevedra. Libraría Michelena, 20:00 horas.

Podedes ampliar esta información aquí

Centenario de Álvaro Cunqueiro

2011-02-14T10:38:00.000+01:00

No 2011 temos unha cita
co universo literario e biográfico de Álvaro Cunqueiro: celébrase o centenario do nacemento do escritor.

Recursos e información sobre esta conmemoración AQUÍ

A biblioteca pon á túa disposición
a obra de Cunqueiro así como estudos sobre
o escritor e os seus mundos literarios, e tamén a Fotobiografía Sonora editada por Ouvirmos
que contén numerosos textos, fotografías e dous CD, un traballo fermosísimo da profesora Rexina Vega.

No 2011 será noticia

2011-01-16T12:56:00.000+01:00

2011 vai ser o Ano Internacional da Química, tal como decidiron a UNESCO e a IUPAC (Unión Internacional de Química Pura e Aplicada). O lema será: “A química, a nosa vida, o noso futuro”.

A química mellorou a nosa calidade de vida desde tempos inmemoriais e en todos os ámbitos da nosa vida: alimentación, potabilización da auga, recipientes, medicamentos, industria téxtil, novas tecnoloxías, produtos de limpeza, etc...

O 27 de xaneiro será a cerimonia inaugural en París e a partir dese momento comezarán as actividades conmemorativas que se repartirán ao longo do ano en moitos lugares do mundo: conferencias, concursos, exposicións... Hai moitísimas actividades. A listaxe completa atópase na páxina web do Foro Química e Sociedade.

O ano 2011 coincide co centenario do Premio Nobel de Química outorgado a Marie Curie. Marie Curie foi a primeira persoa en recibir dous premios Nobel en dous campos diferentes e a primeira muller en ser profesora na Universidade de París. Por coincidir co ano do centenario da concesión do premio Nobel de química a Marie Curie, 2011 constitúe un marco ideal para render homenaxe á contribución das mulleres á ciencia e fomentala.

Pola súa banda, a Asemblea Xeral das Nacións Unidas declarou 2011 Ano Internacional dos Bosques, para concienciarnos dos beneficios económicos, socioculturais e ambientais que proporcionan os bosques e comprender que son imprescindibles no desenvolvemento sostible do planeta. Entre as actividades previstas figura o estudo de estratexias prácticas para frear a deforestación e a degradación dos bosques. Estímase que cada ano se perden máis de 130.000 km² de bosques. A deforestación representa ata un 20 % das emisións globais de gases de efecto invernadoiro, que contribúen ao quecemento global e polo tanto ao cambio climático. Os bosques constitúen o hábitat de ao redor de dous terzos de todas as especies sobre a terra e a deforestación de bosques tropicais produce a perda de biodiversidade de ata 100 especies por día.

Eclipse o día 4

2010-12-27T10:00:00.001+01:00

O día 4 de xaneiro de 2011 vaise producir unha eclipse parcial de sol que en España será moi madrugadora: o máximo producirase sobre as 8:45 - 9:00 h, de maneira que na nosa zona o sol xa sairá eclipsado, pois o mencer é ás 9:01 (todas estas son as horas locais). A porcentaxe de sol eclipsado pode variar, estando en torno ao 65% no norte peninsular. Vale a pena madrugar e esperemos que o tempo acompañe, porque ata novembro de 2013 non teremos, na nosa rexión, outra oportunidade coma esta.

Non esquezades que para observar a eclipse debedes usar filtros adecuados ou adquirir uns lentes especiais que soen vender nas ópticas por moi bo prezo. Tamén valen os cristais de protección dos soldadores que estean numerados do 14 ao 16.

Que tempo fará o día 4? : aquí

Lectura e Fotografía

2010-12-19T09:44:00.003+01:00

A Biblioteca do IES de Tomiño vén de convocar un certame de fotografía que vos vai gustar, para toda a comunidade educativa (alumnado, persoal do centro, familias...) e con premios en metálico. O vindeiro mércores 22 entregarase, xunto co boletín de notas, un precioso folleto coas bases de participación, que tamén podedes consultar e descargar na páxina web do centro, no apartado "biblioteca".

Por riba da media española, pero por debaixo da OCDE

2010-12-08T16:04:00.002+01:00

INFORME PISA

O Informe do Programa Internacional para a Avaliación de Estudantes, ou Informe PISA polas súas siglas en inglés (Programme for International Student Assessment) baséase na análise do rendemento de estudantes a partir duns exames mundiais que se realizan cada tres anos e que teñen como fin a valoración internacional dos alumnos. Este informe é levado a cabo pola OCDE (Organización para a Cooperación e Desenvolvemento Económico), que se encarga da realización de probas estandarizadas a estudantes de 15 anos, medindo a competencia en ciencia, a competencia matemática e a comprensión lectora.
Acaban de publicarse os resultados do último informe, no que participaron ao redor de 65 países, e se ben Galicia se sitúa por riba da media estatal nos tres apartados, non hai que esquecer que
España está por debaixo da media da OCDE, así que aínda é moito o que nos queda por mellorar.

Ampliar esta información aquí

Redelibros

2010-11-30T10:51:00.001+01:00

Nace a primeira rede social galega adicada aos libros: redelibros que vai ser punto de encontro para todo o universo do libro en Galicia: lectores, escritores, libreiros, bibliotecarios, editores, etc. Esta rede permite ao usuario crearse un perfil e participar en foros de debate, chatear cos amigos, subir textos propios, títulos novos e arquivos de audio, comentar e recomendar obras, entre otras cousas. Pódese consultar máis de un millón de libros, e moitos destes títulos ademais ofrecen o primeiro capítulo na rede. O papasol celebra esta iniciativa e xa se rexistrou así que vémonos alí e comentamos as nosas lecturas!

Semana da Ciencia na nosa Biblioteca

2010-11-08T10:58:00.001+01:00

Do 8 ao 21 de novembro

Como cada mes de novembro, o mundo da ciencia e a innovación quere achegarse a ti co gallo da Semana da Ciencia, o maior evento de comunicación social da ciencia e a tecnoloxía. En realidade son quince días nos que os museos, universidades, centros de investigación, parques tecnolóxicos e mesmo empresas, organizan exposicións, cursos, visitas, obradoiros, mesas redondas, excursións ou conferencias, amosando ao público en xeral o seu traballo diario, tanto nos aspectos máis curiosos como nos máis descoñecidos.

A nosa Biblioteca, consciente da necesidade de crear un entorno social máis proclive á ciencia e á innovación, súmase a esta celebración organizando unha exposición de libros de temática científica, co obxectivo de aprender sobre ciencia, afeccionarnos a ela e atopar respostas a moitos interrogantes que xorden na vida cotiá.

Neste sentido Mariló Fernández Mira, profesora de Matemáticas, recomenda ao profesorado un dos libros que a Biblioteca che ofrece: La pizarra digital interactiva (PDi) en la educación:

O Encerado Dixital Interactivo apareceu nos últimos anos no medio dese escenario de transformación social que está a sufrir o mundo educativo co uso das Tecnoloxías da Información e da Comunicación.

Naceu dunha necesidade de adaptación do encerado dixital tradicional, que ve como os contidos dixitais xunto coas simulacións e o mundo da rede, queren seguir formando parte dela.

Na biblioteca do IES de Tomiño, sabendo as necesidades que todos temos de coñecer o funcionamento desta ferramenta tan novidosa, decidiuse mercar este libro para axudarmos nesa tarefa. Este manual que hoxe presentamos, vainos ensinar todo o indispensable para manexar con soltura os tres encerados dos que hoxe xa dispoñemos, así coma os cinco dos que imos dispoñer nun futuro inmediato.

Neste libro encontraremos moitas técnicas de deseño das nosas clases empregando a tinta dixital. Aprenderemos como colocar todo tipo de elementos procedentes da Rede, das editoriais ou dos propios recursos que crean os profesores. E sobre todo descubriremos como dotalos desa interactividade que, sen dúbida, mellorará o ensino na aula.

Regresa a HORA DE LER

2010-10-28T00:00:00.002+02:00

O vindeiro martes 2 de novembro retomamos a nosa Hora de Ler, unha sesión de lectura semanal, simultánea para toda a ESO, da que tedes información nas aulas de referencia e nos taboleiros do centro.

As caixas de lectura xa foron depositadas en todas as aulas, e como novidade tedes este ano, en cada caixa, unha libretiña para apuntar as incidencias, dúbidas e suxestións que vaian xurdindo. Na mesma libreta podedes anotar as vosas opinións sobre os libros que leades, e todas as persoas que o fagan, profesores e alumnos, entrarán no sorteo de lotes de libros e material escolar que se fará no mes de abril, con motivo das celebracións do Día do Libro.

O Premio Nobel

2010-10-11T00:00:00.000+02:00

O Premio Nobel é un galardón moi codiciado pero tamén moi polémico, que entrega todos os anos a Academia Sueca. Segundo deixou escrito Alfred Nobel no seu testamento, o Premio Nobel de Literatura débese entregar cada ano a aquela persoa que produza a obra literaria máis destacada na dirección ideal, pero hai moito tempo que a crítica literaria opina que non se está facendo así e é evidente que moitos autores mundialmente recoñecidos nunca recibiron un Nobel aínda que o merecían de sobra. Así que se nunca gañas un Nobel non te preocupes: estarás en compañía de Tolstoi, Proust, Joyce, Nabokov, Kafka, Borges, Cortázar...

Este ano o galardón será para Mario Vargas Llosa, autor de obras narrativas, ensaísticas e teatrais de repercusión mundial, algunhas delas levadas ao cine. Vén a coñecer a obra de Vargas Llosa na nosa biblioteca.

Ler e Escoitar

2010-09-24T00:00:00.002+02:00

A Dirección Xeral de Centros e Recursos Humanos convoca o CONCURSO DE LECTURA EN VOZ ALTA "ler e escoitar", para 1º ciclo de ESO e 3º ciclo de Primaria.

Os participantes farán unha lectura expresiva de dous textos, un elixido por eles e un elixido polo xurado. A lectura durará entre 4 e 6 minutos. Pódese participar de xeito individual ou en grupo. No caso dos grupos, todos os membros lerán un fragmento de idéntica duración.

Cada centro formará un xurado integrado por, como mínimo, dous profesores dese nivel. Seleccionarase un único gañador de cada modalidade (individual/grupo) para que pase á seguinte fase. Gravaranse en vídeo as súas lecturas e enviaranse antes do 30 de outubro para a fase autonómica. Desta segunda fase sairán cinco finalistas, que serán convocados pola Dirección Xeral de Centros e Recursos Humanos para realizar en directo a lectura final, consistente de novo nun texto elixido polos concursantes e outro elixido polo xurado.

Animádevos a participar! Para unha información máis detallada consultade os taboleiros da Biblioteca.

As goleadoras de Tomiño

2010-06-22T00:00:00.005+02:00

O equipo de fútbol sala feminino infantil do IES de Tomiño gañou este ano a final do campionato de liga escolar, e o equipo cadete acadou o segundo posto da súa categoría. A súa adestradora, a profesora Ledicia Seoane, fala con entusiasmo destas alumnas de 1º e 2º de ESO:

- Comezamos o adestramento no pasado mes de novembro - conta - Adestramos un recreo cada semana, e os mércores pola tarde. A partir do mes de febreiro engadimos otura sesión de adestramento, os venres pola tarde no Pavillón Municipal. Posteriormente a Concellería de Deportes do Concello de Tomiño doou os equipamentos necesarios e xogamos na liga escolar. O Concello aportou tamén os trofeos para a Xornada de Portas Abertas.

Nótase que apreza moito os resultados obtidos en tan pouco tempo. Pero o feito de gañar é o que menos lle preocupa, ela valora máis a mellora que pode ir vendo na coordinación dos movementos e o traballo en equipo.

- Por iso temos que xogar todas e avanzar todas ao mesmo tempo, pois ao final o que conta é o resultado do equipo. Non buscamos "figuras" como noutros equipos onde se te fixas podes ver determinados rapaces que quedan no banquillo todo o tempo: ao facer así os bos seguen sendo bos e os que non o fan tan ben non teñen ocasión de mellorar. Non é iso o que nós queremos, queremos ser un equipo de verdade. A palabra clave é sinerxia, por iso eu sempre lles digo ás rapazas que 2 + 2 = 5, é dicir, como equipo consegues sempre máis cousas que traballando individualmente. O equipo é sempre maior que a simple suma dos seus membros.

En xullo xogarán en Vigo varios torneos. Entre os seus proxectos está participar o vindeiro ano na liga federada, xa que no campionato de deporte escolar hai moi poucos equipos de fútbol sala femininos.
.
- Pediches para a Biblioteca a serie de Laura Gallego titulada "Sara y las goleadoras", recomendándolles esta lectura ás nosas campionas. Por que?
- Creo que lles gustará e poden sentirse identificadas co que se conta neses libros, porque é a historia dunhas rapazas apaixonadas polo fútbol e describe moitas cousas da súa vida, como estudantes no instituto e como deportistas. Hai información na páxina da autora e tamén na páxina da serie, onde se pode descargar o primeiro capítulo dos cinco volumes publicados ata agora: http://www.saraylasgoleadoras.com/

Xornada de Portas Abertas 2010

2010-05-19T19:56:00.005+02:00

Non esquezades que este sábado 22 de maio celebraremos unha Xornada de Portas Abertas para que todo o alumnado e as súas familias, así como todas as persoas interesadas en coñecernos, poidan vir e gozar connosco dunha xornada festiva en que daremos a coñecer o centro, as instalacións, os traballos realizados, etc. todo isto aderezado con varios obradoiros, competicións deportivas, actuacións musicais e moitas sorpresas máis.
Acudide ao centro o vindeiro sábado 22 de maio de 12 a 14 h. pola mañá e de 16 a 20 h. pola tarde!

Mes das Letras

2010-05-14T00:00:00.001+02:00

O pasado xoves 6 de maio celebramos en Tomiño o Correlingua! Esperamos que todos gozasedes coa actividade e citámosvos para o vindeiro venres 21 de maio, día en que celebraremos no noso centro a tradicional Festa das Letras: haberá actuacións musicais, recital de poemas de Uxío Novoneyra, exposición dos Maios, ofrenda de pedras no Milladoiro das palabras e varios actos máis. Non o esquezades: o venres 21 de maio, a partir das 12:00 h, Festa das Letras no IES de Tomiño.

Compromiso co Medio Ambiente

2010-04-08T19:34:00.003+02:00

Dentro da nosa preocupación polo Medio Ambiente, o IES de Tomiño está a desenvolver a campaña "Usa Friameira" : en vista da cantidade de recursos do planeta que se gastan na produción de papel de aluminio, comprendemos que envolver en papel de aluminio o bocadillo é innecesario e absurdo. Pódese comprobar que cada día somos máis os que traemos friameira. Este é o cartel que se deseñou no centro en favor desta iniciativa:

Por outra parte, o Equipo de Normalización Lingüística e o Departamento de Forestais puideron finalmente realizar os actos previstos para a celebración do Día da Árbore, que no seu momento foran aprazados polos destrozos sufridos no centro por causa do temporal.

A actividade consistiu na plantación de exemplares de especies autóctonas no recinto do IES, no xardín situado enfrente do centro e no parque que rodea o novo centro de saúde. Na actividade participaron 100 estudantes de 1º de ESO, así como o alumnado do Ciclo de Actividades Forestais e do PCPI.

Hora do planeta

2010-03-26T11:00:00.004+01:00

Este sábado 27, entre as 20:30 e as 21:30 h. será

A HORA DO PLANETA 2010

A Hora do Planeta é unha iniciativa global de WWF onde individuos,organizacións, empresas e gobernos apagan as luces durante unha hora para votar en favor da acción sobre o cambio climático. Ao votaren cos seus interruptores de luz, os participantes da Hora do Planeta envían unha poderosa mensaxe visual aos seus dirixentes esixindo acción inmediata sobre o cambio climático.
A próxima Hora do Planeta terá lugar o sábado, 27 de marzo de 2010 ás 20:30, hora local. Millóns de personas en todo o mundo apagarán as súas luces durante unha hora, simbolicamente, chamando á acción sobre o cambio climático.
En 2009 uns mil millóns de persoas de máis de 4000 ciudades en 88 países participaron neste evento. En España participaron uns catro millóns de persoas e 200 cidades, apagando edificios emblemáticos como a Alhambra de Granada, a Cibeles, o museo Guggenheim, la torre Agbar de Barcelona e centos de edificios máis.
O mundo respondeu de forma incríbel, apagando a Ponte Brooklyn de Nova York, o Empire State, a Ponte Golden Gate, as Grandes Pirámides de Giza, a Acrópole e o Partenón en Atenas, a Basílica de San Pedro no Vaticano, o Big Ben e as Casas do Parlamento en Londres, o Palacio dos Elíseos e a Torre Eiffel en París...

É a hora do Planeta:
apaga a luz, ilumina o mundo

Amplía esta información: www.wwf.es/horadelplaneta

Semana da Muller

2010-03-16T12:27:00.010+01:00

A pesar da paralización das actividades lectivas por mor dos destrozos causados polo temporal, xa nos imos recuperando e puidemos celebrar a SEMANA DA MULLER, cunha serie de actividades e exposicións como as seguintes:
- Muller e traballo: Exposición de fotografías antigas e modernas coa muller como protagonista, realizando diferentes traballos. Agradecemos ao alumnado e profesorado do centro as súas aportacións.
- O sexismo na publicidade: Exposición sobre o tratamento da muller e o uso da figura feminina na
publicidade, realizada por alumnado de 3º de ESO.
- 100 mulleres galegas: exposición sobre a vida e obra de 100 galegas senlleiras do noso pasado e do noso presente.

Ademais tivemos ocasión de celebrar unha charla-coloquio co lema “A visualización das mulleres en traballos tradicionalmente masculinos”, o xoves 11 de marzo, coa presenza de:

-Sandra González, alcaldesa de Tomiño
- Cristina Rodríguez Ortega, enxeñeira técnica industrial
- Ana Fernández, profesora da Universidade de Vigo.

Volvemos a clase este luns, 8 de marzo

2010-03-06T17:33:00.006+01:00

Co visto bo da Unidade Técnica da Consellería, o IES de Tomiño reinicia as actividades lectivas o luns 8 de marzo ás 9:00h.

Porén, o papasol lamenta moito informar que a biblioteca permanecerá pechada, pois hai que renovar o teito, pulir e vernisar o piso...
Pero non desesperedes: anque o espazo físico da biblioteca estea
tan prexudicado o seu espírito permanece e os fondos están case todos a salvo. Tentaremos de encontrar unha maneira de continuar, polo menos, co servizo de préstamo. Iso require trasladar ordeadamente os materiais a algún espazo onde poidamos xestionalos provisionalmente, posiblemente o salón de actos. Igualmente proseguirán as actividades do Club de Lectura, anque nos reuniremos noutro lugar.
Nada nos vai deter, porque a biblioteca é moito máis que o espazo físico que ocupa.

non haberá clase en ningún nivel

2010-03-02T20:00:00.000+01:00

Por orde da Unidade Técnica suspéndense indefinidamente os cursos convocados de Ciclos, PCPI e 2º de Bacharelato ata nova orde. O edificio non presenta as condicións de seguridade mínimas para as actividades lectivas.

Polo tanto non hai ningún curso con actividades lectivas neste momento.

recuperándonos de Xynthia

2010-03-01T20:12:00.005+01:00

Na imaxe podedes ver parte da cuberta do instituto e xa vos facedes unha idea de que as aulas específicas do segundo andar son, neste momento, as que se atopan nunha situación máis delicada no caso de que chova, anque ao longo da xornada de hoxe o profesorado e demais persoal do centro estivo recollendo os materiais destas aulas para minimizar os riscos de desperfectos.

Seguen suspendidas indefinidamente as actividades lectivas de 1º, 2º, 3º e 4º da ESO, e de 1º de Bacharelato.

Reanúdanse as actividades lectivas de 2º de Bacharelato, Ciclos formativos de Electrónica e Forestais e PCPI (Programa de Cualificación Profesional) a partir do mércores 3 de marzo.

Non deixedes de consultar a páxina web do centro

sen clase ata novo aviso

2010-02-28T21:52:00.009+01:00

Como xa sabedes, o temporal causou danos importantes no noso centro:

Danou moito a cuberta do instituto, especialmente na zona da biblioteca:

Afortunadamente a maioría dos nosos fondos, equipos informáticos, etc. salváronse, os danos son principalmente estruturais.

Os traballos de desescombro e limpeza foron intensos ao longo de toda a xornada de hoxe domingo.

Cómpre botar unha cuberta nova en todo o centro. Este traballo faríase pronto se deixase de chover, o problema é que o tempo non está axudando.

Así que manteñamos a calma e esteamos atentos aos medios de información para saber cando se reanudarán as clases... que non vai ser mañá.

suspéndense as clases

2010-02-27T23:52:00.003+01:00

Xynthia, a tormenta perfecta, causou danos na cuberta do edificio do noso IES que obrigan a pechar o centro, suspendéndose todas as actividades do luns día 1 de marzo. Permanecede atentos aos medios de comunicación, pois é posible que sexa necesario prolongar a suspensión das clases durante máis días.

foto 5

Y menos mal que nos queda Portugal
Ante todo mucha calma,
capear el temporal ...

Visita de Anxo Fariña

2009-12-04T00:00:00.001+01:00

O autor da serie dos Megatoxos visitou o noso centro o día 25 de novembro para conversar co alumnado de 2º ESO sobre o proceso de creación de historias dentro dunha iniciativa da Secretaría Xeral de Política Lingüística e o Servizo de Normalización do Concello de Tomiño.

Estamos desexando ler a terceira entrega, e tamén as sucesivas posto que están previstos sete volumes, algún dos cales sabemos de boa tinta que nos trasladará xa non ao pasado senón ao futuro...

Día Internacional contra a Violencia de Xénero

2009-12-01T00:00:00.000+01:00

O día 25 de novembro celebramos un acto especial organizado polo Departamento de Lingua Galega e literatura para conmemorar o Día Internacional contra a violencia de xénero. Tratouse dunha mesa redonda seguida dun coloquio entre as ponentes e o público. Tivo lugar nun espazo ben bonito para se celebraren actos deste tipo: démoslle un novo uso á cafetaría do centro. Acudiron todos os grupos de 3º ESO e mais 3º e 4º PDC. Interviñeron no acto: Cruz Dafonte Raña, Licenciada en Dereito, traballa como Asesora xurídica na Oficina de Igualdade e Benestar de Gondomar e acode semanalmente a prestar asesoramento ás mulleres de Tomiño; Cati Cerqueira, Licenciada en Psicoloxía e Técnica de Igualdade no noso concello. Confirmara a súa asistencia Sandra González, a alcaldesa de Tomiño, mais non puido acudir por motivos de axenda.

O acto contou con presentación teórica powerpoint, lecturas de casos reais e declaracións de vítimas perante o xuiz, música e videoclips de cantautores como Pedro Guerra ou Bebe que trataron nos seus discos o tema da violencia machista. Comezamos presentando as ponentes e facéndonos unha pregunta: ¿É necesario seguir celebrando todos os anos este día? A desposta foi clara e rotunda: mentres siga existindo esta lacra social que produce tanta infelicidade, dor e mesmo a morte a moitas mulleres de todas as idades e clases sociais, SI.
A pesar de que se acadaron avances importantes desde que se promulgou a Lei Integral contra a violencia de xénero e de que cada vez hai máis denuncias e condenas de prisión para os maltratadotes (nos últimos 3 anos suman xa máis de 53.000), o certo é que a violencia machista non recúa. (50 mulleres mortas no que vai de ano).
Todo traballo é pouco para rematarmos de vez con este problema, pois está moi enraizado nunha sociedade que non é igualitaria e que segue opinando que ser forte, violento e impetuoso forma parte natural do home.
É un problema social, mais tamén é un problema individual: todas e todos debemos implicarnos para solucionalo e previr novos casos. O coloquio-debate estivo moi animado e o tempo resultou escaso para aclarar dúbidas e desmontar moitos mitos erróneos que temos sobre a violencia de xénero. Con esta charla aprendemos un pouco máis sobre como loitar contra esta lacra social. ¡Oxalá nun futuro ben cedo non teña razón de ser unha celebración coma esta cada 25 de novembro!

Magosto o próximo luns

2009-11-20T00:00:00.000+01:00

Este luns, 23 de novembro, celebraremos o Magosto coas seguintes actividades:

· 11:30 RECREO
· Asar castañas no cobertizo: A cargo do alumnado de 1º de forestais, coordenados polo profesor Tito Davila. As castañas véndense a 1 €.
· Péchanse as aulas: Non se voltarán a abrir ata as 14:15
· O profesorado e o alumnado encargado de cada actividade vai preparándose para que as actividades poidan dar comezo a partires das 12:00

· 12:00 COMEZO DAS ACTIVIDADES

· TALLER DE CABAZAS
o O alumnado participante subirá á aula de plástica, onde poderán comezar a elaborar as súas cabazas.
o A partir das 13:00 as cabazas serán baixadas ó vestíbulo, onde se montará unha exposición con elas.
o O xurado fará as puntuacións e outorgará os premios.

· A CASTAÑA MÁIS GRANDE DO MUNDO
o Quedará instalado o Stand do Departamento de Física e Química no vestíbulo do Instituto. O alumnado participante entregará as súas castañas, que serán rexistradas, medidas e pesadas.

· CONCURSO DE FOTOGRAFÍA
o Proxección das fotografías no vestíbulo
o Deliberación do xurado

· CONCURSO DE POSTRES
o Colocación dos postres nas mesas da cafetería para exposición.
o Deliberacións do xurado

· XOGOS TRADICICONAIS: De 12:00 a 14:00

· XOGOS DE EQUIPO. De 12:00 a 14:00

· 13:00 Proclamación dos gañadores

Tralas deliberacións, os xurados proclaman ós gañadores/as dos concursos de cabazas, fotografía, a castaña máis grande, postres e relatos de medo. Os resultados daranse pola megafonía do centro.

· Os xogos tradicionais e de equipo seguen ata as 14:00 h.

· 14:15 Subimos ás aulas
Soa o timbre e todo o mundo se dirixe ás aulas. Cada grupo á súa co profesor/a correspondente. Pásase lista. O alumnado que non queda a comer sairá cando volva a sonar o timbre. O alumnado que queda a comer sairá uns minutos despois.

· 14:30: Comemos.
Se non chove, en calquera parte do exterior e na planta baixa .

· 16:00: karaoke
· Comeza o karaoke no ximnasio.
· Se hai alumnado interesado, pódese seguir cos xogos de equipo.

· 16:30
Chega o alumnado que non quedou a comer. Diríxense a clase, onde se pasará lista, e poderán baixar para incorporarse ás actividades.

· 17:30 Limpeza
Sona o timbre. Cesan todas as actividades. Cada gupo se reune co profesor ou profesora que lle corresponda a esa hora, quen dirixirá as tarefas de limpeza da zona que teña asignada o grupo.

· 18:00 Todos para clase
Dirixímonos todos ás aulas correspondentes, onde se pasará lista.

· 18:10: Fin de festa.

Novo blog de Forestais

2009-11-18T00:00:00.000+01:00

Saudamos con alegría a chegada dun novo blog á comunidade: XANZÁ. Trátase dunha iniciativa dos nosos compañeiros do Ciclo de Forestais, non deixedes de visitar a páxina (tedes un enlace permanente desde aquí, en "páxinas útiles"). O papasol deséxalle unha feliz andaina na Rede!!!

Celebracións no mes de Novembro

2009-10-28T00:00:00.003+01:00

Ata o día 30 estades aínda a tempo de entregar os orixinais para o Concurso de Historias de Medo que se organiza con motivo do Samaín! Tedes as bases nos taboleiros do centro e na Biblioteca, onde tamén podedes ver unha exposición de libros de medo que están á vosa disposición.

Os premios do Concurso de Historias de Medo entregaranse durante a celebración do Magosto, que terá lugar o vindeiro luns 23 de novembro. Estade atentos porque para o Magosto se organizarán moitas actividades interesantes que non quereredes perder!

PALABRAS CON MEMORIA

2009-10-09T00:00:00.008+02:00

PALABRAS CON MEMORIA é unha iniciativa da Asociación de Escritores en Lingua Galega (AELG) que ten por obxecto recuperar palabras nosas en desuso, ou sexa, en perigo de extinción. E tamén palabras e expresións que non recollen os dicionarios.

Esta asociación propón que durante un tempo, para facerlle fronte á globalización e dado que semella posíbel a revitalización e repoboación do noso agro, que entre todos/as recuperásemos o nome dos produtos que nel se daban e quizais se volvan dar. Trátase de, ademais de achegar nomes de castes de froitas, verduras e outros produtos do campo, facer cando se crea necesario unha pequena descrición, resaltando as súas características. Porque as novas xeracións non saben o que é unha saborosa camoesa ou un delicioso peruco e en troques coñecen a encerada "red winter" e a insípida "golden" que lles venden no supermercado. Tamén sería interesante saber particulares tratamentos ou embutidos non comúns da carne do porco ou doutros animais. O EDNL do Centro pon ao voso dispor unha caixa de correo na Biblioteca; nela podedes deixar as VOSAS PALABRAS cubrindo unha papeleta coma esta, e ao remate deste curso farémosllas chegar á AELG.

IES TOMIÑO- LYCÉE FÉNELON: 6º INTERCAMBIO ESCOLAR e Xº ANIVERSARIO DE ENCONTROS

2009-05-29T00:00:00.004+02:00

Por Anxos García Monasterio, profesora de francés responsable da actividade

Realizamos este curso o 6º intercambio escolar co mesmo centro francés, o Lycée Fénelon pero ademais celebramos algo moi especial: os nosos dez anos de encontros e de amizade. E por suposto, isto merecía unha festa por todo o alto. E así foi en Tomiño e en Clermont-Ferrand (Auvergne).

Acollimos ó grupo francés do 10 ó 18 de marzo e fixemos moitas actividades xuntos: as específicas para traballar as linguas que estudamos pero tamén un xogo de pistas na biblioteca, outro para descubrir xuntos os misterios de Santiago de Compostela, actividades deportivas e como colofón o gran concerto no que participou todo o centro. Os “franceses” –coma dicimos nós,- din que o pasaron moi ben e destacaron a nosa amabilidade, simpatía e xenerosidade, ademais de insistir no ben e moito que se come en Galicia! – para nós non é novidade, claro!-

A nosa viaxe tamén foi moi ben. Saímos un mes máis tarde, o 19 de abril e voltamos o 30. En Auvernia, pasamos moito frío aínda que tamén luciu o sol e visitamos moitos sitios nas viaxes de ida e volta, que para algo ten que servir “sufrir” tantas hoars de autocar. Vimos as pinturas rupestres de Lascaux II e as vilas de Sarlat-la-Canéda, Avignon et Carcassonne. Pero o máis entrañable foron os días pasados cos nosos amigos en Clermont, acolléronnos moi ben no concello e no centro, cantamos e tomamos o pastel do décimo aniversario e claro, tamén traballamos algo: fomos a algunhas clases e fixemos as actividades específicas do proxecto “Aprendendo xuntos”, tête à tête cos nosos correspondants. Tamén coñecimos moitos sitios en Auvergne (a súa capital, Clermont, a cadea de volcáns, o museo Michelin...) pero coma sempre, o que máis nos gustou foi ir cos nosos correspondants á vila do Puy-en-Velay ( O Santiago de Compostela auvernés!) e iso que hai que estar ben en forma para subir tantas costas e escaleiras como hai no Puy pero vale a pena!

Algúns sufriron algo coas comidas e con tanto queixo pero de volta, o balance é moi positivo , moitos recomendan vivir esta experiencia e moitos quixeran repetila, sobre todo porque se fan moitas amizades e se pasan moi bos momentos con todos os compañeiros! Pero para participar tamén convén falar un pouquiño de francés! Veña, animádevos!

As profesoras de francés agradecemos moito a todos ós que traballan no centro a súa colaboración e, moi especialmente, ó alumnado e profesorado que organizou todas as actividades lúdicas. Foron un éxito! E tamén ó Concello pola súa acollida e ás empresas de transprte (ATSA e Suárez) que coma sempre nos brindaron a súa axuda sen ninguna obxeción. E por suposto ós/as alumnos/as que participaron e ás súas familias, sen a súa confianza esta actividade non sería posible. Moitas grazas a todos/as.

Día das Letras Galegas

2009-05-20T00:00:00.004+02:00

A semana pasada celebramos no centro a festa das Letras. Isabel Conde González, (2º bac. B) proponnos este contiño para que reflexionemos sobre a situación da nosa lingua.

- Hola, buenos días.
- Ola, bos días.
- Usted ha venido a poner una denuncia, ¿verdad?
- Si, veño denunciar ó meu irmán.
- ¿A su hermano? ¿Y que le ha hecho su hemano?
- Pois a verdade é que teño medo, penso que se propón acabar comigo.
- ¿Y que le hace pensar eso?
- Os feitos, señor, os feitos!
- ¿Qué hechos? Explíquese.
- Vostede debe saber que xa non é a primeira vez. El xa o intentou hai tempo, incluso estiven moitos anos detido, na cadea, sendo eu totalmente inocente, dixo que eu era perigoso, acusoume de querer traizoalo. E eu só quería vivir en paz, coma sempre, no meu fogar, coa miña xente…
- Pero ahora usted es libre, y su situación es legal, está protegido por ley, ¿no?
- Si, pero el quedou con moitas cousas que eran miñas, e non tiña dereito… e eu conformeime coa liberdade. Agora eu xa me estaba recuperando, pero el ten aliados moi fortes, a xente xa non confía en min…e iso que eu coñecín os seus ancestros, eles confiaban en min.
- Entonces dice usted que se siente amenazado, pero la ley lo ampara, debería estar tranquilo.
- ¿De que me serve a lei cando a xente me rexeita? Vostede debería saber mellor ca ninguén que sen a confianza das persoas o meu traballo non vale nada, sería mellor non existir, como meu pai, que despois de darnos a vida a todos, morreu.
- No diga eso hombre, además se dice que goza usted de buena salud y de un magnífico porvenir.
- Contan o que lles convén pero eu dígolle que non, que as cousas deben cambiar ou estarei sentenciado…
- A ver, cuénteme concretamente que acciones está llevando a cabo su hermano en su contra.
- En primeiro lugar, acaparou os medios de comunicación, e agora a xuventude pensa que estou pasado de moda, como non saio na tele que eles vén…e agora ademais din que xa non me van deixar dar clase! Por que me afasta dos rapaces? Non ten dereito, eu levo vivindo aquí dende sempre, nacemos da misma maneira, somos iguais, por que non me deixa en paz? Eu non quero separarme del, só que se cumpran os meus dereitos, nada máis e nada menos que vivir en paz no meu fogar: Galicia.
- La verdad es que tiene razón, pero no sé que decirle, sabe que yo no tengo autoridad, solo le digo que no se rinda que busque apoyos y que luche por o que es suyo. Pero no mencione esto a mis superiores porque puedo tener problemas.
- Ve? Aí o ten, vostede debería estar falando galego pero non é así, isto non é Galicia? Vostede non está traballando na administración de Galicia? Por qué non me fala galego? Quere matarme, igual que o meu irmán?
- No, yo… ten razón, pero o novo Goberno da Xunta non me esixe que fale galego.
- Non sei onde vou ir parar… suponse que a Xunta debería velar pola miña seguridade, pero non é así.
- Se quere conseguir algo vai ter que loitar pola súa conta. Ten que chamar a atención dos máis novos e poñelos da súa parte.
- Si, pero quero poñer esta denuncia, a lei está moi clariña, e se non me fan caso seguirei denunciando ata que me escoiten. Eu e o Castelán nacemos ó mesmo tempo, do mesmo xeito, pero eu nacín aquí e lévolle moitos séculos de vantaxe na miña Terra, por iso el non pode vir aquí e desprestixiarme deste xeito, non o podo permitir. GALEGOS: unídevos a min e loitemos polo que nos pertence!

NOTAS TOMADAS DA DECLARACIÓN PERANTE O XUÍZ DO GALEGO, QUE ACUSA Ó CASTELAN DE ROUBO E INTENTO DE LINGÜICIDIO.

Lembrando o intercambio escolar

2009-04-30T00:00:00.001+02:00

Do 10 ao 18 de marzo tivemos ocasión de acoller aos estudantes franceses de intercambio, que visitaron varios lugares de interese na nosa terra e tamén participaron en actividades académicas no noso centro. Posteriormente o noso grupo realizou a súa estadía en Clermont-Ferrand.

Últimas rondas do torneo de Xadrez

2009-02-18T20:47:00.004+01:00

Continúa o torneo de xadrez cos seguintes resultados:

No enfrontamento de cuartos de final que disputaban Daniel Salguero e Diego Álvarez o primeiro clasificouse para as semifinais tras gañar a segunda partida (o luns gañara a primeira).
No outro enfrontamento de cuartos de final, Nicolás Costa gañou con negras ó seu compañeiro de clase e rival no campionato Eduardo Fragueiro e parece que ten vantaxe na segunda partida.

Por outra banda fíxose o sorteo das semifinais que vai enfrontar o gañador da eliminatoria comentada fronte a Vicente e que está a enfrontar a Noel frente a Daniel.

Esta eliminatoria entre Daniel de 1ºD e Noel de 3ºB xa comezou coa victoria con negras do xogador de 3º. A segunda partida xa está en xogo.

O venres rematará o torneo. Pronto saberemos quen é o mellor do IES de Tomiño.

Xa hai dous clasificados para a semifinal do campionato de xadrez

2009-02-16T23:32:00.003+01:00

Hoxe luns continuou o torneo de xadrez, que cada vez resulta máis emocionante.
Na eliminatoria previa que faltaba por rematar, Nicolás Costas conseguiu obter unhas táboas nunha posición dificil e logo gañar na partida de desempate. O seu rival en cuartos de final vai ser Eduardo Fragueiro.
As outras 3 eliminatorias de cuartos eran:
· a de Vicente Marques frente a Alberto Gómez que foi a primeira en rematar tras abandonar a competición o segundo tras ir perdendo na primeira das dúas partidas. Con este resultado, Vicente convertíase no primeiro semifinalista.
· Nabor xogaba frente a Noel, e este último é o segundo semifinalista tras gañar nas dúas partidas.
· A última eliminatoria enfronta a Daniel Salguero e a Diego Álvarez. O primeiro conseguiu vencer con negras na primeira partida, polo que agora necesita gañar ou empatar con blancas para estar tamén nas semifinais.
O mércores xogaránse as partidas que faltan de cuartos de final.

Torneo de Xadrez, segunda ronda

2009-02-13T12:20:00.003+01:00

Hoxe foi a segunda ronda do torneo de xadrez con algunhas partidas que acabaron moi rápido (como a vitoria de Vincent sobre Kevin) e outras que foron moi disputadas. De feito hai unha partida aínda ser rematar (a que están xogando Nicolás e Adrián).

O próximo luns comezarán os cuartos de final.

A partires desta eliminatoria os enfrontamentos serán a dúas partidas.

O sorteo que acaba de realizarse é o seguinte:

O gañador da eliminatoria pendente (Nicolás C ou Adrián A) - Eduardo Fragueiro
Nabor López - Noel González
Vincent M Marques - Alberto Gómez
Daniel Salguero - Diego Álvarez

Gran Campionato de Xadrez I.E.S. de Tomiño

2009-02-11T21:16:00.004+01:00

Hoxe mércores comezou o campionato de xadrez do IES de Tomiño coa emocionante eliminatoria previa. Finalmente foron 23 os alumnos inscritos no torneo, dos cales 8 quedaron eliminados e quedan 15 para a segunda ronda. Debido á suspensión das actividades lectivas do pasado luns, esta segunda ronda debe disputarse o próximo venres. As seguintes rondas serán o luns e o mércores da próxima semana e as finais no día do Antroido.
Os emparellamentos da segunda ronda son os seguintes (xoga con brancas o primeiro xogador):

Nicolás Costa - Adrián Acuña
Kevin Regedor - Vincent M Marques
Noel González - Samuel Rodríguez
Brais Diniz - Nabor López
Alberto Gómez - David Calzado
Paula Alonso - Daniel Salguero
Diego Álvarez - Álvaro Álvarez
Eduardo Fragueiro -

Concurso Literario Entroido 2009

2009-02-03T00:00:00.001+01:00

O Departamento de Normalización e Dinamización Lingüística do IES de Tomiño convoca, con motivo da celebración do Entroido 2009 un certame literario no que pode participar tanto o alumnado como o profesorado e persoal laboral do centro. Os traballos entregaranse, mecanografados e con plica, aos membros do Departamento de Normalización, ou tamén en Conserxería, ata o 11 de febreiro.

Hai tres modalidades: en verso (sen límite de extensión), relato (entre unha e dúas páxinas) e microrrelato (máximo 100 palabras).

O fallo farase público coincidindo coa xornada de celebración do Entroido no IES. Os premios entregaranse en acto público, sendo nese mesmo momento no que se abran as “plicas” e se coñezan os verdadeiros nomes dos gañadores ou gañadoras.

Os premios son os seguintes:

CATEGORÍA ALUMNADO

Relato

Primeiro premio (Cheque regalo de 30 euros).

Segundo premio (Cheque regalo de 20 euros).

Verso

Primeiro premio (Cheque regalo de 30 euros)

Segundo premio (Cheque regalo de 20 euros)

Microrrelato

Primeiro premio (Cheque regalo de 30 euros)

Segundo premio (Cheque regalo de 20 euros)

CATEGORÍA PROFESORADO E PERSOAL DO CENTRO

Un premio por cada categoría (Material bibliográfico en galego)

Anímate a participar!!! Podes consultar as bases completas da convocatoria nos taboleiros da Biblioteca e na páxina web do centro.

PROXECTO COMENIUS

2009-01-29T00:00:00.006+01:00

Un grupo de profesores do IES de Tomiño está participando, en colaboración con centros de varios países europeos nun proxecto Comenius.
O noso proxecto titúlase « Os Medios de comunicación, unha canle para Europa » (Les médias: un canal pour l'Europe). Este traballo ten como obxectivo sensibilizar ao alumnado (14-17 anos) acerca da súa pertenza a Europa, mediante o uso dos medios de comunicación (prensa, televisión, internet, radio), facilitar o diálogo intercultural, favorecer a educación e desenvolver unha posición crítica cos medios de comunicación.
Neste proxecto bianual está previsto realizar diferentes actividades:
· enquisas
· revista de prensa (analizar como un mesmo suxeito é tratado nos diferentes países europeos)
· concursos de fotoperiodismo
· colaboración con profesionais dos medios de comunicación
· elaboración dunha Primeira Páxina
· creación dun Xornal
· análise de medios de prensa europeos en diferentes formatos

Consulta a páxina do Comenius aquí

Este sitio web, coordinado polo grupo Comenius do IES de Tomiño, permitirá intercambiar información, almacenar e resumir os traballos levados a cabo, actualizar e avaliar os obxectivos do proxecto, e pór en común dun xeito global as actividades dos centros participantes no proxecto: centros de Alemaña, Bélxica, España, Francia e países asociados.

Existen diferentes proxectos que implican aos países que se poden ver na imaxe

Intercambio escolar 2008-2009

2009-01-27T00:00:00.000+01:00

Un curso máis o Departamento de Francés organiza o Intercambio Escolar co centro francés Lycée Fénelon de Clermont-Ferrand. O noso grupo estará formado por 39 alumnos e alumnas, de 3º e 4ºESO e de 1º de bacharelato, e tres profesores: Mª Jesús Gándara (Tecnoloxía), Carlos Villanueva (Bioloxía) e Anxos García (Francés). O grupo francés consta de 36 alumnos e alumnas do nivel correspondente a 4ºESO, que cursan a sección europea en español, e tres profesoras. A responsable da actividade en Fénelon é a profesora de español Nadine Corny.

Primeiro terá lugar a estadía do grupo francés en Tomiño, do 10 ao 18 de marzo. Despois será a nosa visita a Clermont, do 19 ao 30 de abril. Na imaxe, vista de Clermont-Ferrand.

Este ano será moi especial, xa que celebramos o décimo aniversario desta actividade, que se vén realizando cada dous anos desde 1998.

Premiados no concurso de carteis contra a violencia de xénero

2008-12-20T22:25:00.014+01:00

.

O pasado mes de novembro, o Concello de Tomiño convocou un concurso de carteis contra a violencia de xénero; ofrecémosvos aquí os carteis gañadores:

1º premio, obra de Héctor Gutiérrez

................................................................................

2º premio, obra de Rebeca Fernández

................................................................................

3º premio, obra de Adrián Besada

.

Concurso "Contos de Nadal"

2008-12-10T10:13:00.007+01:00

O Servizo de Normalización Lingüística do Concello e a OMIX convocan un concurso de “Contos de Nadal”, con tema libre anque centrado no Nadal, escritos en galego e unha extensión máxima de 5 folios (letra Times New Roman, tamaño 12, dobre espazo).
O prazo de entrega dos relatos remata o 22 de decembro. Os orixinais presentaranse, mediante o sistema de plica, na oficina da OMIX, ou no Servizo de Normalización Lingüística, ou poden enviarse por correo a CONTOS DE NADAL, CONCELLO DE TOMIÑO, Praza do Seixo 1, 36740 Tomiño.

Establécense tres categorías con dous premios cada unha:
Categoría A (de 6 a 8 anos): 1º premio de 60 euros + un lote de libros / 2º premio : un lote de libros
Categoría B (de 9 a 12 anos): 1º premio de 60 euros + un lote de libros / 2º premio : un lote de libros
Categoría C (de 13 a 18 anos): 1º premio de 100 euros + un lote de libros / 2º premio : un lote de libros

A entrega de premios realizarase o día 24 de decembro no salón de plenos do Concello de Tomiño ás 12.00 horas.

Desde aquí animamos a todos e todas a participar: podedes consultar as bases íntegras ou resolver as dúbidas que teñades na nosa Biblioteca.

.

Premiados no I Concurso Galego de Robótica

2008-12-04T00:00:00.002+01:00

O noso centro participou no I Concurso Galego de Robótica, e un grupo de alumnos do Ciclo Medio de Electrónica acadou o Primeiro Premio, compartido co IES Perdouro de Burela e o IES Palas de Rei. O noso alumnado premiado foi:

Andrea Durán Otero

Bruno de Sousa Fertonani

Pablo Campos Fernández

Antonio Oliveira Pinto

NORABOA, SODES XENIAIS!

Amplía esta noticia na páxina web do noso centro

Santa Cecilia

2008-11-24T00:00:00.000+01:00

Para celebrar a Patroa da Música (22 de novembro) e dado que hai tanta xente afeccionada a esta arte na nosa contorna, a Biblioteca realizou unha exposición no seu taboleiro do vestíbulo do centro, elaborada polo alumnado do Proxecto Interdisciplinar "Educación Documental", 1º ESO-D.

Esperamos que vos gustase!

Tempo de setas

2008-11-12T00:00:00.002+01:00

Os nosos compañeiros do Ciclo de Traballos Forestais montaron unha exposición no centro estes días coas setas e cogomelos propios da nosa zona. Tras realizar unha saída para recoller os exemplares, clasificáronos con detalle para que poidas velos e aprender a recoñecelos. Por suposto, na Biblioteca temos varias guías de setas e cogomelos que podes consultar.

Na mostra que nos ofrecen podes atopar todo tipo de cogomelos, desde os máis tóxicos, como diversos tipos de amanitas, ata os máis exquisitos, como andoas, cantarelas, zarrotas, etc. Cada exemplar está identificado co nome científico, o nome galego e unha icona que indica a súa comestibilidade ou toxicidade.

Se che gusta a natureza e queres traballar ao aire libre, o Ciclo Medio de Traballos Forestais e Conservación do Medio Natural é unha boa opción. Aprenderás, entre outras moitas cousas fascinantes, a cultivar as túas propias setas.

Infórmate!

Seminario de graffiti

2008-11-07T00:00:00.000+01:00

Anxo Fariña visitou o noso centro o luns 27 de outubro para impartir un seminario de graffiti, organizado pola Xunta, no noso caso foi para o alumnado de 1º ESO A e 1º ESO C.

Anxo Fariña é autor, entre outras obras, da serie dos Megatoxos, que podes conseguir na nosa Biblioteca.

Premiados

2008-10-29T00:00:00.003+01:00

Moitas grazas a todos e todas pola acollida dispensada á nosa exposición! Estes son os gañadores da primeira edición do Biblioconcurso:

José Romero, 2ºbac B
Hugo Freijeiro, 2º bac B
Roque Fernández, 2º bac B
Jonathan Daniel Salguero, 1º ESO - D
Juan Alvarez, 1º ESO - D

Os premiados poden pasar pola biblioteca a recoller o seu agasallo... e se non obtiveches ningún premio non desesperes, o curso só acaba de comezar, pronto terás outra oportunidade.

Día das Bibliotecas

2008-10-22T12:23:00.003+02:00

Para celebrar o 24 de outubro, Día das Bibliotecas,

hai unha exposición no vestíbulo do instituto, e nela

tedes a posibilidade de participar no Biblioconcurso.

Animádevos, que é moi doado!!

Coñecer mellor a biblioteca

2008-09-26T00:00:00.001+02:00

Na páxina das Bibliotecas Escolares de Galicia encontramos unha divertida actividade para coñecer mellor o funcionamento dunha biblioteca, elaborada polo CEIP Condesa de Fenosa (O Barco). O profesorado que acuda á aula de informática pode aproveitar para realizala cos seus alumnos e alumnas. Animádevos, que está moi ben! Só hai que pinchar aquí.

Somos noticia

2008-09-16T12:00:00.006+02:00

Desde a Biblioteca damos a benvida a todos e todas para un novo curso escolar. Esperamos vervos o xoves 18 cheos de enerxía e ilusión!

Ultimamente puidemos ler na prensa moitas novas relacionadas co ensino, como sempre que se inicia a campaña de "Volta ao Cole"... A revista especializada "Magisterio" publicou a comezos deste mes un estudo que está dando moito que falar. Os últimos datos, do curso 2005-2006, poñen a media do fracaso escolar en España nun 30,8%, polo tanto aumentou 2,3 puntos nos dous últimos anos. O problema é serio: case un terzo da nosa mocidade abandona os estudos antes de tempo, sen rematalos, con consecuencias negativas para o seu futuro. Por comunidades podemos comprobar, porén, que as que menos fracaso escolar presentan son, por orde: Asturias, País Vasco, Navarra, Cantabria, Castela e León e Galicia. O fracaso escolar en Galicia, 25,1% , está bastante por debaixo da media estatal, pero aínda así debemos concienciarnos de que aínda queda moito por mellorar.

Por outra parte, a mesma revista vén de publicar un estudo sobre os resultados na selectividade por centros. Este documento é un "Ranking de Selectividade 2007", é dicir, nel aparecen os 291 centros de Galicia que enviaron alumnos e alumnas á Selectividade, ordeados de mellor a peor resultado. Que posto calculades que ten, nese listado, o IES de Tomiño?

Somos o número 9.

Somos o noveno instituto de Galicia en mellores resultados de Selectividade, e o primeiro dos institutos públicos da provincia de Pontevedra. Isto si que é unha boa nova para comezar o curso.

Se queres ampliar esta información, pincha aquí

.....

Eu tamén leo...La pasión india

2008-06-26T00:00:00.004+02:00

Chegou o verán, tempo de lecer e, como non, de ler. Propoñémosvos unha viaxe á India para estas vacacións.

Un libro que vale a pena, por Alberto Fagín, profesor do Ciclo de Traballos Forestais

A protagonista é unha moza andaluza, a principios do século XX, que vive en Madrid e traballa como bailaria nun local de recoñecido prestixio. O local recibe un día a visita dun Rajá hindú que queda prendado da súa beleza. Entón empeza unha relación amorosa que termina coa sua unión e a moza convértese na nova princesa de Kapurtala, unha rexión moi pobre da India.

Ó longo da novela cóntase a historia desa muller que narra as súas vivencias nun lugar tan diferente do que ela coñecía, a convivencia multicultural nese enorme país de tanta diversidade relixiosa, como funcionaba a ocupación británica e como había conflitos entre ámbalas dúas partes, describe a problemática (que aínda existe actualmente) no norte do país, e sobre todo o libro é magnífico pola extraordinaria descrición que fai dos costumes do pais hindú e dos excesos dos Rajas e Majarajas mentres o pobo pasaba fame... Pero o que máis me fascionou foi a historia de amor que acontece contra o final.

actividades fin de curso

2008-06-18T00:00:00.001+02:00

...

O vindeiro venres día 20 pecharemos o curso cunha serie de actividades a partir do recreo, entre elas o sorteo das cocas para o premio do Catálogo de árbores senlleiras, e a entrega dos diferentes premios a cargo da Biblioteca (Día do Libro, Concurso de deseño "o papasol"...) Por certo, no salón de actos poderedes ver a exposición con todos os deseños participantes. Unha vez máis, grazas a todos e todas !!

...

Prazos de matrícula

2008-06-13T00:00:00.003+02:00

Pronto rematará o curso e teremos que ir pensando no curso que vén, así que aquí tedes a información necesaria para matricularvos no noso centro:

PARA MATRICULARSE NA ESO

1º E.S.O.

Prazo de matrícula:
23, 24 e 25 de xuño de 2008 (de 9 a 14 h)

Documentación:
- Impreso de matrícula debidamente cuberto (adquírese no propio centro: 0,50 € )
- 2 fotos para o expediente co nome e apelidos por detrás
- 2 fotos para o pase de autobús (se utiliza transporte) co nome e apelidos por detrás
- Fotocopia DNI (sen recortar) ou fotocopia libro familia
- Fotocopia tarxeta sanitaria (sen recortar)

Alumnos doutros CONCELLOS: Certificado de empadronamento

Para os demais cursos da ESO:

1. ALUMNOS DO PROPIO CENTRO

Prazo de matrícula
- Se aproban TODO en xuño: 26, 27 e 30 de xuño de 2008 (de 9 a 14 h)
- Se suspenden algunha en xuño matricúlanse en setembro, despois de faceren os exames de setembro.

Documentación:

2ºESO:

- Impreso de matrícula debidamente cuberto (adquírese no propio centro: 0,50 € )
- 1 foto para o expediente co nome e apelidos por detrás
- 2 fotos para o pase de autobús (se utiliza transporte) co nome e apelidos por detrás

3º ESO / 4º ESO :

- Impreso de matrícula debidamente cuberto (adquírese no propio centro: 0,50 € )
- 1 foto para o expediente co nome e apelidos por detrás
- 2 fotos para o pase de autobús (se utiliza transporte) co nome e apelidos por detrás
- Número da Seguridade Social (NUSS)
- SEGURO ESCOLAR (Ingresar 1,12 euros na conta do I.E.S. de Tomiño en CAIXANOVA e traer o xustificante)

2. ALUMNOS PROCEDENTES DOUTROS CENTROS

Prazo de matrícula
- Se aproban TODO en xuño: 25, 26, 27 e 30 de xuño de 2008 (de 9 a 14 h)
- Se suspenden algunha en xuño matricúlanse en setembro, despois de faceren os exames de setembro.

Documentación
- Impreso de matrícula debidamente cuberto (adquírese no propio centro: 0,50 € )
- 2 fotos para o expediente co nome e apelidos por detrás
- 2 fotos para o pase de autobús (se utiliza transporte) co nome e apelidos por detrás
- Fotocopia DNI (sen recortar) ou fotocopia libro familia
- Fotocopia tarxeta sanitaria ou da Cartilla da Seguridade Social
- Certificado de empadronamento en Tomiño
- Certificado de estudos do último curso, é imprescindible

ADEMAIS, PARA 3º e 4º ESO:

- Número da Seguridade Social (NUSS)
- SEGURO ESCOLAR (Ingresar 1,12 euros na conta do I.E.S. de Tomiño en CAIXANOVA e traer o xustificante)

PARA MATRICULARSE NOS CICLOS FORMATIVOS:

Prazo de matrícula :
- Se remataron a ESO: 21 a 28 de xullo de 2008 (de 10 a 13 h)
- Se non aproban 4º ESO ata setembro, matrícula en outubro

Documentación

1. ALUMNOS DO PROPIO CENTRO

- Impreso de matrícula debidamente cuberto (adquírese no propio centro:0,50 € )
- 2 fotos co nome e apelidos por detrás
- SEGURO ESCOLAR (Ingresar 1,12 euros na conta do I.E.S. de Tomiño en CAIXANOVA e traer o xustificante)
- Fotocopia DNI sen recortar (alumnos de 1º ano)

2. ALUMNOS PROCEDENTES DOUTROS CENTROS

- Impreso de matrícula debidamente cuberto (adquírese no propio centro:0,50 € )
- 2 fotos co nome e apelidos por detrás
- Fotocopia DNI (sen recortar)
- Fotocopia tarxeta sanitaria
- Certificado de cumprir os requisitos para o acceso a ciclos
- Número da Seguridade Social (NUSS)
- SEGURO ESCOLAR (Ingresar 1,12 euros na conta do I.E.S. de Tomiño en CAIXANOVA e traer o xustificante)

PARA MATRICULARSE NO BACHARELATO

Prazo de matrícula: 14 a 18 de xullo de 2008 (de 10 a 13 h). Se suspenderon algunha en xuño, matrícula en setembro, despois de facer os exames de setembro.

Documentación

1. ALUMNOS DO PROPIO CENTRO

- Impreso de matrícula debidamente cuberto (adquírese no propio centro:0,50 € )
- SEGURO ESCOLAR (Ingresar 1,12 euros na conta do I.E.S. de Tomiño en CAIXANOVA e traer o xustificante)
- 2 fotos co nome e apelidos por detrás
- Fotocopia DNI sen recortar (alumnos de 1º ano)

2. ALUMNOS PROCEDENTES DOUTROS CENTROS

- Impreso de matrícula debidamente cuberto (adquírese no propio centro:0,50 € )
- 2 fotos co nome e apelidos por detrás
- Fotocopia DNI (sen recortar)
- Fotocopia tarxeta sanitaria
- Certificado de Estudos
- Certificado de Empadronamento
- Número da Seguridade Social (NUSS)
- SEGURO ESCOLAR (Ingresar 1,12 euros na conta do I.E.S. de Tomiño en CAIXANOVA e traer o xustificante)

Eu tamén leo... “El maravilloso viaje de Nils Holgersson”

2008-06-02T00:00:00.000+02:00

Os libros que lemos cando nenos acompáñannos para sempre. Realmente, non seriamos nós mesmos sen eles. Algúns, co paso do tempo, convértense en clásicos, como este de Selma Lagerlöf, Premio Nobel de Literatura en 1909.

A infancia é a nosa patria , por Eduardo Fresco, profesor de Filosofía

Se é certo que a infancia é a nosa patria, o meu país nativo tal vez fora Suecia. Cando era aínda máis pequeno que agora, sempre, sempre que estaba enfermo (e librábame de ir ao colexio) lía o mesmo libro: “El maravilloso viaje de Nils Holgersson a través de Suecia”, de Selma Lagerlöf. Conta cómo un rapaz é convertido nun duende e emprende, subido a un ganso doméstico adoptado por unha bandada de gansos salvaxes, unha longa migración cara ao norde a través de toda Suecia.
En realidade (iso entendino máis tarde) é un libro de xeografía para escolares escrito por encargo do goberno, grazas ao cal miles de rapaces suecos aprenderon, dende 1906, a mitoloxía, a historia e os costumes do país, a ubicación dos ríos e es cidades, dos desfiladeiros e as montañas. Pero para min, que nada teño que ver co país escandinavo, era a escapatoria da febre, a tos e o aburrimento. Mentres meu pai estaba de viaxe, os meus cinco irmáns ían no cole (daquela había clase mañá e tarde de luns a venres) e a miña nai trasteaba na cociña, eu viaxaba por toda Suecia subido no pescozo dun ganso doméstico fuxitivo, facendo turnos na formación en uve (xa saben, cuestións de aerodinámica) e vendo todo un país a vista de paxaro: calzadas de xigantes, cidades sumerxidas, esforzados labregos escandinavos.

De tanto que o lin cheguei a aprenderme o título en sueco (Nils Holgerssons underbara resa, así, pronunciado a martelazos) e fixen un detallado mapa de toda a ruta de vóo.

Hai libros que cando un os le os reescribe ao seu soberano gusto. Eu reescribín este tantas veces como o sigo recordando hoxe. Por iso endexamais o volvín ler. É mellor así. Tal vez se os tumbos da vida me deixan voltar á infancia en forma de ancián emprenderei outra vez a paciente migración cara a terras mellores, fatigado pero (espero) satisfeito do camiño, desexando en van (esta vez sí, en van) non chegar nunca ao final. Que os deuses me concedan esa sorte!

Premios

2008-05-31T00:00:00.011+02:00

1º premio do concurso de deseño "O Papasol" para a categoría B,

obra de Nair Melo Pazos.

Seguramente xa vistes expostos no noso centro os deseños gañadores do Concurso de Debuxo "O papasol". O xuri estivo composto por Puri Ameixide, en representación da Biblioteca, Fernando Ortiz, polo Departamento de Debuxo, Cruz Garrido, polo Equipo Directivo e Santi Groba como representante do alumnado no Consello Escolar.

Non houbo participantes da categoría C, pero dada a gran calidade e cantidade das obras presentadas nas outras categorías, o premio acumulouse a estas, de maneira que se entregarán dous premios para a categoría A (primeiro ciclo ESO) e dous premios para a categoría B (segundo ciclo ESO), ás seguintes participantes:

CATEGORÍA A:

1º premio: Jenifer Guerreiro Costa, 1ºD

2º premio: Claudia Alonso Alonso, 1ºC

CATEGORÍA B:

1º premio: Nair Melo Pazos, 3ºE

2º premio: Bianca Fernández Díaz, 3ºA

...

A Biblioteca porase en contacto convosco para a entrega de premios.

Estamos valorando unha festa de final de curso onde exporiamos todos os deseños participantes, pois de verdade que son estupendos (á esquerada podes ver o 1º premio da categoría A, obra de Jenifer Guerreiro Costa). Ese día entregariamos tamén os Premios do Día do Libro, que son os seguintes:

1º premio: Uxía Sobrino de Santiago, 2ºE

2º premio: Tania Troncoso Pérez, 4ºC

3º premio: María Alonso Ferreira, 2ºC

Mencións de Honra: Tamara Pereira Riveiro, 4ºC e Sheila Ríos Campos, 1º bac B

Festa das Letras Galegas

2008-05-14T00:00:00.007+02:00

O venres 16 de maio, a partir das 12:00h., celebraremos o Día das Letras, con actividades do máis diverso: ademais das Exposicións que se montaron no centro (Sobre Xosé Mª Álvarez Blázquez, e en relación cos seus traballos de etnografía e arqueoloxía, reconstrucións de útiles prehistóricos) haberá unha demostración do uso de enerxías tradicionais, aplicadas a unha cociña solar coa que o alumnado de 1º bacharelato nos preparará un chocolate solidario. Leremos o manifesto "Polo dereito a vivirmos en galego" e poemas de Xosé Mª Álvarez Blázquez, colocaremos as tradicionais pedras no Milladoiro das Palabras e admiraremos os Maios elaborados polo alumnado de 1º ciclo de ESO... E moitas cousas máis, por exemplo unha actuación musical sorpresa dun grupo do profesorado... (Non pode haber festa sen música)

O mes das Letras Galegas

2008-05-13T00:00:00.000+02:00

Ao longo do mes de maio son moitas as iniciativas en prol da nosa lingua organizadas por diversas entidades, por exemplo o Correlingua, que será o xoves 15 de maio, en Salceda, e do noso centro acudirán os grupos de 3º ESO. A saída será ás 9:30h. e regresarán para as 14:30h.

De entre as iniciativas que se poden ver na Rede, poida que vos pareza graciosa esta: a agrupación comarcal luguesa da Mesa pola Normalización Lingüística organizou o concurso Mobilízate pola túa lingua dentro da campaña "Polo dereito a vivirmos en galego" de cara a promover a manifestación que co mesmo lema se vai celebrar en Compostela o vindeiro 18 de maio. Recibiron moitos videos interesantes, a duración máxima é de dous minutos, e poden verse os finalistas no blog da Mesa en Lugo. Recomendámosvos especialmente o chiki friki do galego.

Se queres acudir á manifestación en Compostela o domingo 18 de maio, saberás que comeza ás doce na Alameda e rematará na Praza da Quintana. A Concellería de Mocidade do Concello de Tomiño facilítache un autobús gratuíto. Este autobús sairá da Praza do Seixo (Tomiño) ás 9:30h. e volverá de Compostela ás 16:30h. Só tes que inscribirte na OMIX... e xa sabes: é gratuíto!

Escribes?

2008-05-08T10:53:00.005+02:00

Lembrámosvos que no vestíbulo de acceso á Biblioteca tedes información útil sobre certames literarios e doutro tipo. Desde aquí animámosvos especialmente a participar no Primeiro Certame Literario CEIP de Sobrada e no Segundo Certame de Poesía "Xela Arias" do IES "A Sangriña" de A Guarda.

Por outra parte, no noso centro chegou o momento de elaborar a revista, Brétema. Este ano, ademais das seccións habituais, de creación literaria, noticias e actividades realizadas durante o curso, artigos de investigación e divulgación interesantes, etc, dende o Equipo de Normalización propóñennos novas seccións:

CARTAS DO LECTOR: Escribide facendo suxerencias, críticas, comentarios sobre o centro, contando as vosas impresións sobre a vida diaria nel...

HUMOR: Rir e moi san. Anécdotas, chistes, contos que fagan sorrir ou rir ás gargalladas...

ENTREVISTAS: A alguén relevante na vida do centro ou da vila.

DEPORTES: Noticias sobre o deporte local. Mozos e mozas do centro que practican un deporte de competición. Entrevistas aos nosos campións e campionas.

Podedes entregar os vosos traballos preferiblemente en soporte informático aos profes de Lingua Galega, ou a calquera membro do Equipo de Normalización (Sara, Cheli, Lechuga, Tito, Marga). Tamén os podedes enviar por correo electrónico o seguinte enderezo, indicando que é un traballo para Brétema, margaritasanz@edu.xunta.es
A extensión máxima dos traballos non debe superar as dúas páxinas en tamaño letra 12 e dobre espazo, e a data límite para entrega de traballos é o 12 de maio.

Eu tamén leo... Crepúsculo

2008-04-22T13:09:00.015+02:00

Stephenie Meyer é unha autora norteamericana que actualmente fascina á mocidade do mundo enteiro coa súa obra Crepúsculo e as secuelas Luna Nueva e Eclipse. De momento podes conseguir estas obras na Biblioteca, mentres esperamos con impaciencia os dous volumes que aínda faltan por publicar, Breaking Dawn (Rompendo o mencer) e Midnight Sun (Sol de Medianoite).

Unha de amor ................. por Nerea Vergara González, 1ºbac

Isabella Swam non quere realmente vivir co seu pai en Forks, unha cidade onde sempre chove e nunca hai sol...
Pero este só será o primeiro paso cara unha gran aventura, cara unha serie de descubrimentos que cambiarán a súa forma de ver o mundo, cara un grande amor.

O éxito da serie de Stephenie Meyer (composta ata o de agora por Crepúsculo, Luna Nueva e Eclipse) baséase na visión completamente diferente que ten dos vampiros e outros seres mitolóxicos que formaron parte sempre de multitude de lendas populares. Por primeira vez un autor achega ao vampiro a humanidade, outorgándolle todo tipo de sentimentos e levando ao lector a sentirse profundamente identificado con el. Meyer recolle o retrato do vampiro máis famoso de todos os tempos e tráeo á actualidade, entregándolle os dotes sensuais que Stoker quixo darlle a Drácula, pero dándolle tamén bondade e sentimentos complexos que comparte cunha familia.

Tamén as descricións físicas da raza son novas. Non hai rasgos de novela gótica que poidamos asociar coa morte ou as capacidades asasinas dalgunhas personaxes. Ao contrario, todos os "non humanos" móstranse como unha especie de "Clarks Kents" ao resgate.

Por suposto tamén hai malos; é entón, nas loitas ou fuxidas finais (que sempre hai algunha) cando debemos ter un bo estómago e prepararnos para as aparicións de golpes e, sobre todo, sangue. Pero aínda así estas imaxes son moi escasas e pouco descritivas en comparación con outras. Rapidamente, a protagonista (Bella) logra librarse con menor ou maior sorte dos "malos".

A verdadeira complicación dos libros é que ao lector lle fai falla unha boa dose de paciencia nalgúns momentos, xa que a narradora-protagonista conta minuciosamente cada unha das súas actividades do día, sen permitirse deixar apenas unha hora en branco. Ás veces custa resistirse á tentación de saltar algunhas páxinas.

Pero de pronto xorde a acción e quedas atrapado.

Lingua de amor

2008-04-04T00:00:00.004+02:00

O Consello da Xuventude de Galicia (CXG), a través do seu Servizo de Normalización Lingüística, puxo en marcha a II edición de Lingua de Amor, o concurso de declaracións de amor a través do correo electrónico.

Lingua de Amor ten como obxectivo principal dinamizar o uso da lingua galega en espazos de comunicación habituais para a mocidade como son os correos electrónicos, chats, foros...

Para participar no concurso só hai que rexistrarse na páxina http://www.linguadeamor.eu/ e enviar unha declaración de amor en galego (máximo 350 caracteres). A data límite para o envío das declaracións é o 14 de maio de 2008.

Nesta edición establécense dúas categorías de idade (de 14 a 19 anos e de 20 a 30). En canto aos premios, haberá tres por cada unha das categorías:

Categoría A:
1º Consola Nintendo wii + un lote de libros en galego
2º DVD portátil + un lote de libros en galego
3º MP3 + un lote de libros en galego

Categoría B:
1º Viaxe a París para dúas persoas + un lote de libros en galego
2º Ordenador portátil + un lote de libros en galego
3º TV LCD 19” + un lote de libros en galego

Ademais, os 200 primeiros/as participantes recibirán un agasallo por cortesía da Secretaría Xeral de Política Lingüística !!

Novas da OMIX (abril 2008)

2008-04-03T00:00:00.008+02:00

Como xa saberedes, está á vosa disposición no Campo da Feira a Oficina Municipal de Información Xuvenil.

Tel/Fax 986 623 304
Correo electrónico: omixtominho@yahoo.es

Eli é a técnica de mocidade, que visita habitualmente o noso centro e nos informa de moitas actividades interesantes ás que te podes apuntar. Por exemplo, para este mes de abril tes as seguintes, dirixidas a mozos e mozas de 12 a 35 anos e totalmente gratuitas:

- Programa de deshabituación tabáquica. Comezo o 15 de abril na OMIX.
- Xornadas de educación vial. Mércores 30 de abril no IES de Tomiño.
- Curso de Malabares. Sábado 12 e Domingo 13 de abril no Campo da Feira.
- Curso de Pandeireta. Comezo o 9/16 de abril no Centro Goianés.
- Concurso de Pintura (estilo libre). Prazo de entrega dos traballos: 28 de abril.

Ademais é importante destacar que xa está aberto o prazo de inscrición na CAMPAÑA: ACCIÓN VERÁN 2008 da Vicepresidencia da Igualdade e do Benestar para os campamentos dirixidos a nenos e nenas de 9 a 17 anos e para as actividades ofertadas a mozos e mozas de 18 a 35 anos. LEMBRA: O PRAZO DE INSCRICIÓN REMATA O 11 DE ABRIL

E ti que libro es?

2008-03-31T00:00:00.006+02:00

Con que libro te identificas? Cal cambiou a túa forma de ver o mundo? Que libro serías se, como na novela Fahrenheit 451, de Ray Bradbury, as persoas fósemos libros?

Estas son as preguntas que Escola de Escritores propón aos internautas que respondan no proxecto "A túa vida nun libro" a través de Internet.

Escola de Escritores realizará unha consulta aos internautas hispanohablantes desde o próximo 1 de abril ata o 23, Día do Libro, na que os invitará a elixir os libros que marcaron un antes e un despois na súa vida, creando un vínculo emocional entre as persoas e as súas lecturas. Pretenden así animar á reflexión sobre a lingua e a literatura coincidindo coa celebración do Día do Libro, o 23 de abril, do mesmo xeito que xa fixo en anos anteriores coas iniciativas "Apadriña unha palabra en vías de extinción" e "A palabra máis fermosa do español".

"A túa vida nun libro" desenvolverase en Internet, a través do portal http://www.escueladeescritores.com/ , onde os internautas, a partir do próximo martes 1 de abril e ata o 21 dese mesmo mes, poderán participar e ler as experiencias doutros participantes, entre eles escritores, profesores, xornalistas e persoas do mundo da cultura.

Ademais do título da obra (de calquera xénero) e o seu autor, os participantes están invitados a comentar que significado tivo ese libro na súa vida. Segundo Javier Sagarna, director de Escola de Escritores, "todos temos un libro -novela, poemario, libro de contos, libreto, obra de teatro ou ensaio- ao que non só debemos agradecer a paixón que sentimos pola literatura, senón que marcou o rumbo das nosas vidas". Non se trata de escoller o mellor libro escrito xamais, "senón aquela obra que, ao lela, nos cambiou para sempre". Para o director de Escola de Escritores, "ás veces, asomarnos a algúns libros prodúcenos a mesma vertixe que mirar nun espello máxico: algúns libros son espellos de tinta, como diría Borges, un caudal de historias, personaxes e lugares que van deixando un sedimento en nós, cambiándonos, contándonos, moldeándonos á súa imaxe". Por iso, este ano Escola de Escritores propón aos internautas hispanohablantes que celebren o Día do Libro mirándose nese espello e contando cal foi o libro que mellor leu a súa vida, a lectura que lle marcou, o libro que o define, o libro -en definitiva- que sería se as persoas fósemos libros.

O 23 de abril, coincidindo co Día do Libro, moitas das obras elixidas se converterán en "libros de carne e óso", xa que a asociación cultural Proxecto Fahrenheit 451, na que cada persoa leva un libro na súa mente, colaborará con "A túa vida nun libro" para que esas persoas-libro homenaxeen as obras elixidas recitando de memoria varias pasaxes nun acto público.

Eu tamén leo... El niño con el pijama de rayas

2008-03-24T00:00:00.000+01:00

Este foi o libro máis solicitado na nosa Biblioteca durante o primeiro trimestre, tanto polo alumnado como polo profesorado.

Ler para ser outro, por Anxos García Monasterio (profesora de Francés)

Admitiredes que non é doado facer a reseña dun libro cuxa historia non se debe contar, segundo nos prevén seu editor. E penso que está no certo. Cúmprese aquí aquilo de ler para ser outro. Para ser Bruno. Un neno de nove anos que medra afacéndose a unha realidade confusa sobre a que, inxenuamente, se fai moitas preguntas. E nós, lectores, facémonos nenos, coma el, canda el. E malia intuír, se cadra moi pronto, o que nos pode ocorrer, seguimos lendo, seguimos sendo Bruno, non podemos deixalo; presentimos, si, pero non satisfacemos a nosa curiosidade, queremos saber ata o final. Unha lectura moi recomendable que nos lembra que “ser” é manter os ollos abertos e a mente esperta, incluso cando non ousamos ser rebeldes.

Concurso de debuxo “O PAPASOL”

2008-03-07T12:24:00.001+01:00

1. A Biblioteca do IES de Tomiño, en colaboración co departamento de Debuxo, convoca un concurso para deseñar a súa mascota, que será un papasol ou xoaniña.

2. Todo o alumnado do centro pode participar, establecéndose tres categorías, cada unha co seu premio:

categoría A: Primeiro Ciclo de ESO
categoría B: Segundo Ciclo de ESO e Ciclos Formativos
categoría C: Bacharelato

3. Os debuxos realizaranse en formato DIN-A-3, nun modelo que se recollerá en Conserxería. No DIN-A-3 que se facilite aos participantes, estes deberán debuxar un papasol ou xoaniña de fronte, de perfil e de costas. As imaxes creadas poderán ser realistas ou imaxinarias, e a técnica tamén será libre: rotuladores, ceras, pinturas de cores, etc.

4. Nos orixinais non se porá o nome do autor: na parte de atrás pegarase un sobre pechado, e no sobre constará, por fóra, un seudónimo e a categoría pola que participa (A,B, ou C). No interior do sobre escribirase o seudónimo e o nome verdadeiro do concursante, apelidos e curso-grupo ao que pertence.

5. Os orixinais entregaranse na Biblioteca, e o prazo de entrega rematará o mércores 30 de abril ás 12:50 (cambio de clase de 4ª a 5ª hora)

6. O xuri estará formado pola profesora responsábel da Biblioteca, un representante do alumnado, un representante do Equipo Directivo e un representante do Departamento de Debuxo.

7. Haberá un premio para cada categoría, consistente nun vale por 20 euros para utilizar nunha libraría de Tomiño, pero se os orixinais non tivesen a calidade necesaria poderá outorgarse un único premio.

8. Os traballos presentados serán propiedade da Biblioteca, con dereito a usalos nas actividades que organice, así como no blog da Biblioteca Escolar, O Papasol.

Eu tamén leo... Harry Potter

2008-02-25T00:00:00.006+01:00

A Biblioteca acaba de adquirir a última entrega das aventuras do famoso mago. Publicada o día 21, o 22 no recreo xa estaba á vosa disposición no andel de "novidades"... Estaba, porque evidentemente xa non está: todos os exemplares se emprestaron ese mesmo día.

Harry Potter ou o pracer de discutir cos amigos ... por Puri Ameixide, profesora de Lingua e responsábel da Biblioteca

Comecei a ler HP un pouco por obrigación: era o que lían os meus alumnos e alumnas, eu traballaba na Biblioteca Escolar, coidei que debía coñecelo, anque non me atraía en absoluto a temática. En xeral a literatura fantástica soe aburrirme e non encontro nela nada que non estea xa, e moito mellor contado, en O Señor dos Aneis.
Como a serie ía xa bastante avanzada, lin os tres primeiros tomos dunha tacada e sufrín a espera do tomo seguinte cada ano, intercambiando teorías cos meus alumnos, vendo confirmadas as miñas sospeitas, gozando inmensamente con esa frase que lle fai crer a quen a pronuncia que ten superpoderes: "Xa cho dicía eu!" Creo que aí residía o segredo do éxito da serie: na espera do tomo seguinte imaxinando o que pasaría nel e discutíndoo cos amigos.

Agora publícase o desenlace, anque na miña opinión está moi por debaixo da gran calidade do tomo III, gran favorito da maioría dos lectores, e do tomo V, que a min persoalmente cada día me gusta máis.

O tomo V non me parece literatura fantástica en absoluto. Contén unha fascinante análise, moi completa e lúcida, dos mecanismos de poder de calquera sociedade complexa, o papel dos medios de comunicación, o dilema moral de elixir entre medrar socialmente ou rebelarte contra a inxustiza, a necesidade de madurar e aceptar as propias contradicións, así como as experiencias básicas de todo ser humano: o amor e a morte.

E sobre todo, a perplexidade de descubrir que o Ben e o Mal non están tan separados, e entre un e outro hai unha infinidade de matices, expresados cando Sirius lle di a Harry a frase máis xenial de toda a saga: "O mundo non se divide en boas persoas e mortífagos..."

Catálogo de árbores senlleiras

2008-02-14T00:00:00.005+01:00

O EQUIPO DE NORMALIZACIÓN LINGÜÍSTICA DO IES DE TOMIÑO coa colaboración do CONCELLO DE TOMIÑO, vai traballar na elaboración dun CATÁLOGO DAS ÁRBORES SENLLEIRAS DO NOSO CONCELLO.

Para facer unha guía é precisa a colaboración de todos e todas, só así poderemos acceder a todos os lugares do Concello. Se coñeces unha árbore ou formación vexetal que mereza ser incluída no catálogo, recolle datos sobre ela enchendo unha ficha que podes pedir en Conserxería.

Todos os alumnos e alumnas que participen achegando información sobre algunha árbore senlleira entrarán no sorteo do ORDENADOR PORTÁTIL donado pola Concellería de Medio Ambiente do Concello de Tomiño.
Por cada dato proporcionado (correcto e comprobado pola organización) o participante terá unha opción no sorteo. Cantos máis datos traias, máis posibilidades tes de conseguir o ordenador.

As opcións do sorteo chamarémolas COCAS (as bólas dos carballos) e cada participante recibirá tantas cocas numeradas como datos entregue. Utilizaremos as cocas como bólas no sorteo. Se acadamos datos suficientes durante este curso, o sorteo farase no mes de xuño.

O carballo de Vilameán
é un bo exemplo de árbore senlleira

Terán a consideración de senlleiras as árbores e as formacións de calquera especie, tanto autóctona como foránea, situadas en terreos de propiedade pública ou privada, que sexan merecentes de atención en canto ás excepcionais características do seu porte, idade, rareza, significación histórica ou cultural, interese científico, educativo, estético, paisaxístico ou calquera outra circunstancia que as faga merecedoras desta especial consideración.

Para clarexar calquera dúbida ou para entregar os datos, diríxete ao Departamento de Ciencias ou ao de Forestais.

Esta é unha iniciativa do Equipo de Normalización e Dinamización Lingüística do IES de Tomiño, en colaboración cos Departamentos de Bioloxía e de Forestais. Colabora con nós a Concellería de Medio Ambiente do Concello de Tomiño, que aporta o premio.

Eu tamén leo... O Principiño

2008-01-30T00:00:00.000+01:00

Inauguramos esta sección para falar dos libros que nos gustan, das lembranzas que nos traen e os bos momentos que nos fixeron e nos fan pasar. Envíanos as túas colaboracións.

Eu non son de reler libros por Carlos Villanueva (profesor de Bioloxía)

Eu non son de reler libros, pero este tíveno moitos anos sempre perto. Regaloumo un tío da Arxentina cando tiña 13 anos. Xa lera algún capítulo solto en libros de lectura do cole e non me gustara, pero como era un agasallo decidín lelo.

O comezar, o libro cóntanos cómo a xente maior xulga o mundo desde o seu único punto de vista... e equivócase. Así, o autor rompe os nosos prexuízos e nos prepara para o resto da lectura. É entón cando aparece o principiño amosándonos a súa visión do mundo dos adultos, a súa amizade co raposo ou o seu amor incondicional pola roseira. Ao final da lectura, un querería seguir a falar con ese neno de risa engaiolante, collelo da man e acariñalo.

LIBROS LIBRES

2008-01-11T00:00:00.000+01:00

Desde comezos deste curso vén sendo habitual atopar libros no vestíbulo de entrada á Biblioteca, que podes levar para ti como agasallo.
Estes libros agora levan unha etiqueta BookCrossing, que os identifica. Se queres, podes botar unha ollada á páxina do movemento BookCrossing, onde che explican en que consiste: persoas que desinteresadamente ceden os seus libros para que outros os lean. Nesa páxina podes rexistrarte, buscar libros, acudir aos lugares onde se anuncia que se van "liberar" libros, participar no foro...
Se liberas algún libro podes seguir a súa viaxe ao redor do mundo: quen o colleu, a onde o levou... Nunca se sabe, un dos teus libros pode acabar en Australia, xa se ten dado o caso.
É moi interesante, mira aquí ou no vestíbulo da Biblioteca, onde atoparás a Mesa de Liberación con exemplares novos todas as semanas.
Se necesitas axuda para liberar algún libro pídea na Biblioteca a través do Buzón de Suxerencias, indicando o teu nome e curso.

ano novo, novos servizos

2007-12-30T00:00:00.000+01:00

A Biblioteca do IES de Tomiño quérevos felicitar as festas dunha maneira moi especial. Un ano remata, pero outro comeza, cheo de proxectos e ideas para compartir. Que esta páxina sexa un novo punto de encontro para toda a comunidade escolar e nos aporte cada día algo novo.