14/2/17

Imos ó teatro: achegámonos a Cousas de Castelao


O pasado venres 10 de febreiro, uns douscentos alumnos de 1º e 4º de ESO asistiron na Casa da cultura a unha representación teatral baseada no clásico da literatura gallega Cousas, de Castelao.

Nesta proposta teatral da man de Os Quinquillans tentouse ser fiel á obra, publicada en 1926, e composta por pequenos relatos que o autor de Rianxo ilustraba cun debuxo. Na esencia de Cousas está a sociedade galega, o retrato dunha época afastada no tempo, pero con moito de global e atemporal.

A montaxe provocou en moitos momentos o riso, posto que Castelao manexaba coma ninguén a retranca, a comedia, a farsa; mais tamén estivo moi presente a tristura e a traxedia, sentimentos variados que se desprenden da obra. Apareceron en escena relatos tan coñecidos como "O pai do Migueliño", que recrea a dureza da emigración, unha temática que tristemente segue a resultar actual; ou o "Rifante", que despois de coñecer o éxito non soubo xestionar unha época mala e cría que a vergoña era peor que a fame. Estes e outros relatos que se mesturaron na escena con pinceladas sobre o propio Castelao, un dos grandes renovadores da nosa prosa e un dos autores que mellor entendeu e representou o pobo galego.


9/1/17

Tres novidades en lingua castelá, recomendadas para o segundo trimestre

1) El mar, de Patricia García Rojo.


Rob tiña sete anos cando o mar levoullo todo. Agora, once anos despois, a xente visita en catamarán os pobos dos tellados onde viven os que, como Rob, decidiron quedar nos terreos que gañou o mar. Para o resto da xente pasaron a ser unha atracción turística, e  é que non todo o mundo entende por que non volveron terra dentro, como os demais sobreviventes.
O libro está dividido en cen capítulos curtos e sorprende pola súa construción en círculos que van   desde un feito ancorado na realidade -un tsunami-
ata a fantasía dunha pedra rosa con propiedades   máxicas, para demostrar que o mundo non é o que   parece.

A autora fala neste vídeo sobre o libro, o resto da súa produción literaria e o que sentiu ao gañar o Premio Angular do 2015.

Se queredes ter unha opinión do libro, podedes ver a seguinte videorreseña.


2) El libro de los rostros, de Ana Alonso y Javier Pelegrín.



Unha lectura curta, fresca e entretida, que trata sobre os perigos das redes sociais, usadas ás veces sen moita precaución. 

A protagonista, Eva, como case todos os adolescentes, síntese a gusto falando a través dunha pantalla, sen ter que mirar aos ollos a quen está alén. Non é unha parva; só precisa sentirse querida. Doutra banda está David, un personaxe tan interesante que tedes que descubrir vós mesmos.




3) Todos los héroes han muerto, de Blanca Álvarez.

Todo comezou coa enfermidade do seu avó, coa súa obsesión por atopar un perdido número seis. Aquel número traspasou as barreiras do seu mundo para instalarse na vida de Vicente. Tratábase só dun número, ou quizá unha clave, un nome? O seis levaba anos acazapado, esperando o momento oportuno para vingarse e Vicente non estaba disposto a seguir escoitando só o silencio

28/11/16

O IES de Tomiño chámase IES Antón Alonso Ríos



Como sabedes, nestes primeiros meses de curso estivemos pronunciándonos sobre se o noso centro seguía denominándose co nome da localidade na que se sitúa ou se adoptaba o dalgunha personalidade de relevo vinculada ao noso municipio, nunha toma de decisión que reflectiron os medios de comunicación, tanto a televisión como a prensa.





Case 3000 votos emitíronse, a maioría deles desde a páxina web do centro. A elección do nome do maestro, escritor e político galeguista Antón Alonso Ríos foi apoiada polo 36% das persoas. A defensora das mulleres e dos movementos campesinos, Isaura Gómez, foi o segundo nome máis votado, cun 34%. O mantemento do actual nome, IES de Tomiño, foi a opción preferida dos alumnos e persoal do centro, mais a terceira en número de votos totais (29%).

Antón Hipólito Alonso Ríos (Camporrapado- Silleda, 1887 - Bos Aires, 1980) representa unha loita incansable alentada polo compromiso coa plena soberanía de Galicia, o seu recoñecemento como nación e a defensa das clases populares, a través da súa participación no movemento agrarista e a implicación na colectividades de emigrantes. Tamén procurou a extensión do ensino á zona rural, promovendo un ensino laico, democrático e en galego, como se pon de manifesto na dirección da escola de emigrantes da Aurora del Porvenir en Tomiño.

Foi un destacado orador e articulista, fundamentalmente durante o periodo republicano. Como ensaísta publica Co pensamento na patria galega (Bos Aires, 1942) e A cultura galega na súa dimensión americán (Bos Aires, 1961), sendo figura fundamental da literatura en lingua galega durante o exilio. Posteriormente dará a coñecer a súa fuxida da represión en O Siñor Afranio. Ou como me rispei das gadoupas da morte (1979), obra que se reflicte neste documental. Até os últimos anos da súa vida continuará a participar das actividades patrióticas da colectividade galega emigrada.

14/11/16

As festas do outono.


O pasado luns pola tarde celebramos no instituto unha mestura de Magosto e Samaín nunha festa á que xa nos afixemos nos últimos anos. Moitos alumnos e profesores comemos no centro os saborosos bocadillos e as castañas que prepararon os alumnos de Forestais e as pizas e sobremesas cuxa esmerada elaboración debemos aos alumnos de 4º ESO que este ano irán de viaxe de fin de etapa. Os que quixeron participaron en deportes tradicionais, animáronse co sempre exitoso karaoke ou se presentaron a algún concurso (cabazas, fotografía...). Todo isto, aderezado coa colorida ambientación que correu a cargo do alumnado e profesores de Plástica. E, como o de atoparnos os vivos e os mortos nalgún punto do camiño gústanos tanto, xa temos unha escusa perfecta para ler un libro de terror ou fantasmagórico. Todos estes podedes vir buscalos á biblioteca.






Relatos breves, contos, lendas...
El fantasma de Canterville y otros cuentos, de Óscar Wilde (andel 156, en español).

Os Relatos de terror e os Relatos fantásticos, de H. P. Lovecraft (andel 180, en galego).

O suspense de Edgar Allan Poe, que podedes ler tanto en inglés (andel 29 e 31) como en español (andel 146).

As lendas de G. A. Bécquer (Leyendas, en español, andel 119).



Os clásicos...

A novela gótica de Gastón Leroux, A pantasma da ópera (hai unha edición escolar moi recomendable en inglés, The phantom of the opera, de Vicens Vives, no andel 29).

El extraño caso del doctor Yekyl y mister Hyde, de R. L. Stevenson (en español, andel 151, e en inglés, andel 29).

A romántica criatura que inaugura a moderna ciencia ficción: Frankenstein, de Mary Shelley (andel 149, en español; andel 190, en galego).





Os non-mortos...
E se o que nos gustan son os vampiros, podemos quedarnos co orixinal, o Drácula de Bram Stoker (en español, andel 151), ou consumir un edulcorado sucedáneo (saga Crepúsculo de Stephenie Meller, andel 138, en español).

24/10/16

Feliz Día Mundial da Biblioteca

Hoxe celebramos o Día Mundial da Biblioteca e queremos felicitarvos desde a nosa, aínda que non sexa  tan famosa como a exipcia de Alexandría, a máis grande do mundo na súa época, e da que, como veriades, tedes pinceladas informativas na cristaleira do espazo multiusos do noso instituto. Desde aquela ata as actuais, algunhas belísimas e ultramodernas, as bibliotecas son espazos nos que os libros agardan por nós, a que vivamos a vida das súas palabras.

Aquí tedes un vídeo feito pola biblioteca pública municipal de Mota del Cuervo no que se lles rinde homenaxe.